ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާތަކަށް، އާންމު އުސޫލުން ފުލުހުންގެ އާއިލާތަކަށް ލިބޭ ބޭސްފަރުވާ ލިބޭ ގޮތަށް ފުލުހުންގެ ވަޒީފާގެ ގަވާއިދު އިސްލާހުކޮށްފި އެވެ.

ދިވެހި ފުލުހުންގެ ހިދުމަތުން ވަނީ މުވައްޒަފުންނާއި، އެ މުވައްޒަފުންގެ އާއިލާތަކުގެ އިތުރުން ރިޓަޔާކުރާ އޮފިސަރުންނަށް ލުއިފަސޭހަތަކެއް ހޯދައިދިނުމުގެ ގޮތުން ވަޒީފާގެ ގަވާއިދަށް ހެޔޮ ބަދަލުތަކެއް ވަނީ ގެނެސްފަ އެވެ. އެގޮތުން ވާޖިބު އަދާކުރަނިކޮށް ނިޔާވާ ފުލުހުންގެ ޖަނާޒާގެ ކަންކަން ހާއްސަ ރަސްމިއްޔާތެއްގައި ބޭއްވުމުގެ އިންތިޒާމު ހަމަޖެއްސުމަށް ވެސް މި ގަވާއިދުގައި ބަޔާންކޮށްފައިވެ އެވެ. ނަމަވެސް މިގޮތަށް ނިންމާނީ ހާދިސާ ހިނގި ގޮތާއި މުވައްޒަފުގެ ދައުރަށް ބެލުމަށްފަހު އެގްޒެކެޓިވް މެނޭޖްމަންޓް ބޯޑުންނެވެ.

Ad by Hajj Corporation

މި އިސްލާހުތަކުގެ އިތުރުން، ފުލުހުންގެ 93 ވަނަ އަހަރީ ދުވަހާ ގުޅިގެން ކޮމިޝަނަރ އޮފް ޕޮލިސް ވަނީ ރިޓަޔާކުރާ ފުލުހުންނަށް ވެސް މުހިންމު ލުއިތަކެއް ލިބިގެންދާނެކަން އިއުލާންކުރައްވާފައެވެ. އެގޮތުން ޝަރަފުވެރިކަމާއެކު ރިޓަޔާކުރާ ފުލުހުންގެ އިނާޔަތްތައް ހިސާބުކުރާ ލިމިޓަށް ބަދަލުގެނެސް، ހިދުމަތްކުރި މުއްދަތަށް ބަލައި އިނާޔަތް ލިބޭނެގޮތަށް ވަނީ ހަމަޖައްސާފައެވެ. އަދި ހިދުމަތުގައި ދެމިހުރި ފުލުހެކޭ އެއްފަދައިން، 25 އަހަރަށްވުރެ ގިނަ ދުވަހު ހިދުމަތްކޮށްފައި ރިޓަޔާކުރާ ފުލުހުންނަށްވެސް ބޭސްފަރުވާގެ ހިދުމަތް ލިބޭނެ އިންތިޒާމު ވަނީ ހަމަޖައްސާފައެވެ.