އިންވެސްޓްމަންޓްތައް ރާއްޖޭގެ ޤާނޫނީ އަދި ސިޔާދަތީ ބާރުވެރިކަމުގެ ދަށުގައި އޮންނަނަމަ، ދިގު މުއްދަތަކަށް ކުއްޔަށް ދިނުމަކީ ކަންބޮޑުވާންޖެހޭ ކަމެއް ނޫންކަމަށް ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް ފޮރ ނޭޝަނަލް ޓެރިޓަރީ އެންޑް ސޮވްރިނިޓީ، އަދި ކުރީގެ ބަންޑާރަނައިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އާޒިމާ ވިދާޅުވީ، ދިވެހިންގެ ޤައުމީ ލަނޑުދަނޑިއަކީ 2040 ވަނަ އަހަރާ ހަމަޔަށް ތަރައްޤީވެފައިވާ ޤައުމަކަށް ދިވެހިރާއްޖެ ވެގެން ދިޔުން ކަމަށާއި، މިކަން ޙާޞިލުކުރުމަށްޓަކައި ރާއްޖޭގެ ހުރިހާ ވިސްނުންތަކެއް އެ މިޞްރާބަށް ބައްޓަންވާންޖެހޭ ކަމަށެވެ. އަދި ތަރައްޤީގެ ރާސްތާގައި ދިވެހިންނަށް އެންމެ ކަމުދާ ޤައުމަކީ ސިންގަޕޫރު ކަމަށާއި، އެ ޤައުމުގެ ތަރައްޤީއަކީ އިޖްތިމާޢީ އަޚްލާޤާއި، ލަނޑުދަނޑިއަށް ވާޞިލުވާން ތަރައްޤީކުރި ޤައުމީ ވިސްނުންތަކާއި، ޤައުމުގެ ކާމިޔާބީއާ ދެކޮޅަށް ރައްޔިތުން މަސައްކަތްނުކުރުމުގެ ނަތީޖާ ކަމަށް ވިދާޅުވިއެވެ.

Ad by Hajj Corporation

ރާއްޖޭގެ ތަރައްޤީއަށް މިއަދު އޮންނާނޭ އެންމެ ބޮޑު ގޮންޖެހުމަކީ ދިވެހި އާބާދީ މުސްކުޅިވުމާ ދިމާލަށް މިސްރާބުޖެހުމާއި، ތަމްރީނުވެފައިވާ އިންސާނީ ވަޞީލަތްތަކާއި އެކަށީގެންވާ އިންވެސްޓްމަންޓްތައް ގެނައުންކަން ފާހަގަކުރައްވަމުން އާޒިމާ ވިދާޅުވީ، އެކަށީގެންވާ މުއްދަތެއް ލިބިނުދީ ބޮޑެތި އިންވެސްޓްމަންޓްތައް ނުގެނެވޭނެ ކަމަށެވެ. އަދި ކަންބޮޑުވާންޖެހެނީ 99 އަހަރަށް ކުއްޔަށް ދީގެން ނޫން ކަމަށާއި، ކަންބޮޑުވާންޖެހޭނީ މުއްދަތު ކުރުވިޔަސް ދައުލަތުގެ ދުސްތޫރީ އަދި ޤާނޫނީ އޮނިގަނޑުގެ ދަށުގައި އިންވެސްޓްމަންޓްތައް ނުހުންނަނަމަ ކަމަށްވެސް އެކަމަނާ ވިދާޅުވިއެވެ. ކުއްޔަށް ދިނުމުން ލިބޭ ޤާނޫނީ ބާރުވެރިކަމާއި ބިން މިލްކުވުމުން ލިބޭ ޤާނޫނީ ބާރުވެރިކަމުގައި ވަރަށް ބޮޑެތި ތަފާތުތަކެއް ހުންނާނެކަންވެސް ފާހަގަކުރެއްވިއެވެ.

އާޒިމާ އިތުރަށް ވިދާޅުވީ، ސިޔާސީ ވިސްނުމުގައި ސަރުކާރު ބަލިކުރަން އިންވެސްޓްމަންޓްތައް ބޭރުކުރުމުން ގެއްލުންވަނީ ވެރިމީހާއަށް ނޫން ކަމަށާއި، ގެއްލުންވަނީ ހުރިހާ ދިވެހި ރައްޔިތުންނަށް ކަމަށެވެ. މީގެއިތުރުން ޖީއެމްއާރްގެ އެއްބަސްވުމާ ގުޅޭގޮތުން ވާހަކަދައްކަވަމުން އެކަމަނާ ވިދާޅުވީ، އެ އެއްބަސްވުން ބާޠިލުކުރަން ޖެހުނީ ރާއްޖޭގެ މާލީ، ޤައުމީ ސަލާމަތާއި ފަތުރުވެރިކަމަށް ސީދާ ގޮންޖެހުންތަކެއް ހުރެ، އެކަންކަން އިޞްލާޙުކުރަން ކުރި މަސައްކަތް ކާމިޔާބު ނުވުމުން ކަމަށެވެ. އަދި މިއަދު ފެންނަ އެއަރޕޯޓުގެ ފައިދާ ދިވެހިންނަށް ލިބުމަށް މަގުފަހިވީ އެ އެއްބަސްވުން ބާޠިލުކުރުމުން ކަމަށް ވިދާޅުވިއެވެ.

ދިވެހިންގެ މަސައްކަތުން ތަރައްޤީކޮށްފައިވާ ކުންފުނިތަކުގެ ޙިއްޞާ ބޭރުގެ ފަރާތްތަކަށް ވިއްކައި އިޤްތިސާދާއި ކްރިޓިކަލް އިންފްރަސްޓްރަކްޗަރގެ ކޮންޓްރޯލް ބޭރު މީހުންނާ ޙަވާލުކުރުމާއި، ކަނޑުމެދުން ހިއްކައި އެއްވެސް ވަޞީލަތެއް ނެތް ފަސްގަނޑެއްގައި ތަރައްޤީގެ މަޝްރޫޢު ހިންގައި ތަން އާބާދުކުރުމަށް ފުރުޞަތު ދިނުމަކީ މުޅިން ތަފާތު ދެ ކަމެއް ކަމަށްވެސް އާޒިމާ ފާހަގަކުރެއްވިއެވެ.