ރާއްޖެއަށް ބައިނަލްއަގުވާމީ އެވޯޑްތައް ލިބުމަކީ ފަތުރުރުވެރިންގެ އިތުބާރު ރާއްޖެ އޮތް މިންވަރު ދައްކުވައިދޭ ކަމެއް ކަމަށް މޯލްޑިވްސް ކޯޕަރޭޝަންގެ ޑިރެކްޓާރ އަސްރާ ނަސީމް (އަސްރާ) ވިދާޅުވެއްޖެ އެވެ.

މެންދުރު ޓީވީގެ މައުލޫ ޕްރޮގްރާމްގައި ވާހަކަ ދައްކަވަމުން އަސްރާ ވިދާޅުވީ ވޯލްޑް ޓްރެވެލް އެވޯޑްސްގައި ރާއްޖޭއިން ހޯދި ކާމިޔާބީ ހާސިލްކުރުމުގައި ވަރަށް ބައިވެރި ފަރާތްތަކެއްގެ ބުރަ މަސައްކަތް ޝާމިލްވާ ކަމަށެވެ.

Ad by Hajj Corporation

ވާލްޑް ޓްރެވަލް އެވޯޑްސް 2026 ގައި އިންޑިއަން އޯޝަން ކެޓަގަރީގެ ދަށުން ރާއްޖެއިން ވަނީ 26 އެވޯޑެއް ހާސިލުކޮށްފަ އެވެ. މި އެވޯޑްތައް ލިބުނު ދާއިރާތަކުގެ ތެރޭގައި ރިޒޯޓުތަކާއި، ހޮޓާތަކާއި، އެއާލައިންތަކާއި، އެއާޕޯޓުތަކާއި އަދި ޓުއާ އޮޕަރޭޓަރުންނާއި، ޓްރެވަލް އެޖެންސީތަކުގެ އިތުރުން ފަތުރުވެރިކަމުގެ އެކި ތަޖުރިބާތަކުގެ ދާއިރާތައް ހިމެނެއެވެ.

މި އަހަރު ބޭއްވި 33 ވަނަ ވާލްޑް ޓްރެވަލް އެވޯޑްސްގައި އިޢުލާނުކުރި އިންޑިއަން އޯޝަންގެ 53 ކެޓަގަރީގެ ތެރެއިން، އެންމެ މަޤްބޫލު މަންޒިލެއްގެ ގޮތުގައާއި މުއައްސަސާތަކުގެ ފެންވަރުގައި ރާއްޖެއަށް ފަސް އެވޯޑު ލިބުނުއިރު، ދެން ހިމެނޭ 26 އެވޯޑު ކާމިޔާބުކުރީ ރާއްޖޭގެ ފަތުރުވެރިކަމާއި ވައިގެ ދަތުރުފަތުރުގެ ދާއިރާގެ ވިޔަފާރިތަކުންނެވެ.

މަޤްބޫލް މަންޒިލެއްގެ ގޮތުގައާއި މުއައްސަސާތަކުގެ ފެންވަރުގައި ރާއްޖެއަށް ލިބުނު ފަސް އެވޯޑު ނުހިމަނައި، އިންޑިއަން އޯޝަން ކެޓަގަރީގެ ބާކީ އޮތް 48 އެވޯޑުގެ ތެރެއިން 26 އެވޯޑު ހާސިލުކުރީ ރާއްޖޭގެ އެކި އިންޑަސްޓްރީގެ ފަރާތްތަކުންނެވެ. އަދި އެހެން ހުރިހާ މަންޒިލްތަކާއި ޖަމްޢިއްޔާތައް އެއްކޮށް ހޯދާފައިވަނީ ޖުމްލަ 22 އެވޯޑެވެ.

އަސްރާ ވިދާޅުވީ ވިދިވިދިގެން 7 ފަހަރު އިންޑިއަން އޯޝަންސް ލީޑިން ޑެސްޓިނޭޝަންގެ މަގާމު ރާއްޖެއަށް ލިބުމުން ދުނިޔޭގެ ސަމާލުކަން ވެސް ރާއްޖެއަށް ލިބިގެން ދާ ކަމަށާއި، މިއީ ހަޤީގަތުގައި ވެސް ރާއްޖެއަށް ލިބުނު ވަރަށް ބޮޑު ކުރިއެރުމެއް ކަމަށެވެ.