އައްޑޫ ސިޓީގެ ހިތަދޫގައި ތިން އެކްސިޑެންޓެއް ހިނގައި، ހަތް މީހަކަށް އަނިޔާވެގެން ފަރުވާދޭން ފަށައިފިއެވެ.

ފުލުހުން ބުނީ، ހިތަދޫގެ އެކި ސަރަހައްދުތަކުގައި ތިން އެކްސިޑެންޓެެއް ހިނގައިގެން މިރޭ އެ އިދާރާއަށް ރިޕޯޓުކޮށްފައިވާ ކަމަށާއި، އެ އެކްސިޑެންޓުތަކުގައި ހަތް މީހަކަށް އަނިޔާވެ، އައްޑޫ އިކުއިޓޯރިއަލް ހޮސްޕިޓަލުގައި ފަރުވާދެމުން އަންނަ ކަމަށެވެ.

އެ މީހުންގެ ތެރޭގައި ހިމެނެނީ ހަ ފިރިހެނަކާއި އަންހެނަކު ކަމަށް ވެސް ފުލުހުން ބުންޏެވެ.

އެ އެކްސިޑެންޓްތައް ހިނގީ ސައިކަލު ޖެހިގެން ނަމަވެސް، ސީރިއަސް އަނިޔާތަކެއް ލިބިފައިނުވާ ކަމަށް އެ ހޮސްޕިޓަލުން ރިޕޯޓުކުރާ ކަމުގައި ފުލުހުން ބުންޏެވެ. އެ އެކްސިޑެންޓްތަކުގެ ތެރެއިން ދެ އެކްސިޑެންޓެއްގެ ސީންއަށް ފުލުހުން ދިޔައިރު، ސީން ރޫޅާލައިފައިވާ ކަމުގައި ވެސް ފުލުހުން ބުންޏެވެ.

އެ މައްސަލަ ފުލުހުން ގެންދަނީ ތަހުގީގުކުރަމުންނެވެ.