ދިވެހި މުޖުތަމައުގެ އަހުލާގީ އަދި އާންމު އިޖުތިމާއީ މިންގަނޑުތައް ހިފެހެއްޓުމަކީ، ދިވެހިރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަންޖެހޭ އާންމު މަސްއޫލިއްޔަތަކަށް ވާއިރު، ރާއްޖޭގައި ދިރިއުޅޭ ބިދޭސީން ދިވެހި މުޖުތަމައުގެ ސަގާފަތާއި އާދަކާދަ އަށް އިހުތިރާމްކޮށް، އާންމު ތަންތަނާއި މަގުމަތީގައި އުޅޭ އުޅުމުގައި، މުޖުތަމައުގެ އާންމު އިޖުތިމާއީ އަދި އަހުލާގީ މިންގަނޑުތައް ހިފެހެއްޓުމުގެ ޒިންމާ އަދާކުރުމަށް، ދިވެހި ފުލުހުންގެ ޚިދުމަތުން އެދިއްޖެއެވެ.

ފުލުހުން ބުނީ މިހާރަކަށް އައިސް، ދިވެހިރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއާ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައި އަދި އެނޫން އާންމު ތަންތަނުގައި އުޅޭކަން އެ ހިދުމަތަށް ވަނީ ފާހަގަކުރެވިފައި ކަމަށެވެ.

Ad by Hajj Corporation

އަދި ބައެއް ބިދޭސީންގެ މިފަދަ އަމަލުތަކަކީ، މުޖުތަމައުގެ އާންމު ސުލޫކީ އަދި އަހުލާގީ މިންގަނޑުތަކާ ހިލާފު އަމަލުތަކެއްކަމާއި، އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ހާލަތްތަކެއް ކުރިމަތިވުމުގެ ކުރިން އެފަދަ ކަންކަން ހުއްޓުވުމަށް އެ ޚިދުމަތަށް މަތިކޮށްފައިވާ ގާނޫނީ ޒިންމާ އަދާ ކޮށް އެފަދަ ފަރާތްތަކާމެދު ގާނޫނު ނަންބަރު 2010/11 )އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު( ގާނޫނުގެ ދަށުން އެޅެންހުރި ފިޔަވަޅު އަޅާނެކަމުގައި ފުލުހުން ވަނީ ބުނެފައެވެ.

ފުލުހުން ވަނީ އެފަރާތެއްގެ ބެލެހެއްޓުމުގެ ދަށުން ދިވެހިރާއްޖޭގައި ދިރިއުޅޭ ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އެ ބިދޭސީންގެ އަމަލުތައް ބެހެއްޓުމަށް ހާއްސަ ސަމާލުކަމެއްދިނުމަށް ބިދޭސީންނާއި ހަވާލުވެތިބޭ ފަރާތްތަކަށް ދިވެހި ފުލުހުންގެ ޚިދުމަތުން އިލްތިމާސްކޮށްފައެވެ.

އަދި ރާއްޖޭގައި ދިރިއުޅޭ ފަރާތްތަކުގެ އިތުރުން ރާއްޖެއަށް ޒިޔާތްކުރާ ފަތުރުވެރިންނަށް ހާއްސަ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭ އުޅުމުގައި ދިވެހި މުޖުތަމައުގެ ސަގާފަތާއި އާދަކާދަ ތަކަށް އިހުތިރާމުކޮށް، މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް އެފަދަ ފަރާތްތަކަށް ހިދުމަތް ދޭފަރާތްތަކުން ހާއްސަ ސަމާލުކަމެއް ދިނުމަށް އެފަރާތްތަކަށް ދިވެހި ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.

އަދި މިއާއި ޚިލާފަށް ޢަމަލުކުރާ ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް ވެސް ފުލުހުން ވަނީ ބުނެފައެވެ.