ދުނިޔޭގެ އެންމެ މަގުބޫލު އެއް ކަލިނަރީ ޓީވީ ޕްރޮގްރާމް ކަމަށްވާ މާސްޓަރޝެފް ސްރީލަންކާގެ ހާއްސަ އެޕިސޯޑެއް ދިވެހިރާއްޖޭގައި ޝޫޓްކޮށް، ރާއްޖޭގެ ކެއުންތަކާއި، ސަގާފަތާއި އަދި މެހެމާންދާރީ ދައްކުވައިދޭ އެޕިސޯޑެއް، 3 އޮކްޓޯބަރު 2026 ވާ ހޮނިހިރު ދުވަހުގެ ރޭ 10:00 ގައި ޓީވީއެމް އިން ދެއްކުމަށް ތައްޔާރުވެއްޖެއެވެ.

މި އެޕްސޯޑް ދެއްކުމަށް ތާވަލްކޮށްފައިވާ ގަޑިޔަށް ބަދަލެއް އައުމަކީ އެކަށީގެންވާ ކަމެއް ކަމަށް ވެސް އެކޯޕަރޭޝަނުން މައުލޫމާތުދެ އެވެ.

Ad by Hajj Corporation

މި ހާއްސަ އެޕިސޯޑަކީ މޯލްޑިވްސް ހޮލިޑޭ ކަލެކްޝަންސް (އެމް.އެޗް.ސީ ގްރޫޕް) އަދި އޮފިޝަލް ޑެސްޓިނޭޝަން ޕާޓްނަރުގެ ގޮތުގައި ވިޒިޓް މޯލްޑިވްސް ކޯޕަރޭޝަން (ވީ.އެމް.ސީ) ގުޅިގެން ގެނެސްދޭ އެޕިސޯޑެކެވެ. މި އެޕިސޯޑުގައި މާސްޓަރޝެފް ސްރީލަންކާގެ ފަނޑިޔާރުންނާއި، ހޯސްޓް އަދި ބައިވެރިން ރާއްޖެ އައިސް، ރާއްޖޭގެ ހިތްގައިމު ރަށްތަކުގެ މާހައުލުގައި ކެއްކުމުގެ ގޮންޖެހުންތަކާ ކުރިމަތިލާ މަންޒަރު ފެނިގެންދާނެއެވެ.

މި އެޕިސޯޑުގެ ސަބަބުން ބެލުންތެރިންނަށް ރާއްޖެއާ މެދު ތަފާތު ނަޒަރަކުން ދެކުމުގެ ފުރުސަތު ލިބިގެންދާނެއެވެ. އެގޮތުން، މި ވާދަވެރި މުބާރާތުގެ ތެރެއިން ދިވެހި ކެއުމުގެ ބާވަތްތަކާއި، ރަހަތަކާއި މެހެމާންދާރީ ދައްކުވައިދީ، ސަރަހައްދީ ފެންވަރުގައި ރާއްޖޭގެ ކަލިނަރީ އައިޑެންޓިޓީ އުފައްދައި، މުޅި ދުނިޔެއަށް މަޝްހޫރު ރާއްޖޭގެ ގޮނޑުދޮށްތަކާއި ކަނޑުއަޑީގެ ރީތިކަމުގެ އިތުރުން ރާއްޖޭގެ އެހެނިހެން ތަޖުރިބާތައް ވެސް ދައްކާލެވޭނެއެވެ.

އޮފިޝަލް ޑެސްޓިނޭޝަން ޕާޓްނަރުގެ ގޮތުގައި ވީ.އެމް.ސީ އިން މި ޕްރޮޑަކްޝަނަށް އެއްބާރުލުން ދީފައިވަނީ، މަންޒިލް އިޝްތިހާރުކުރުމުގެ އުކުޅުތައް ސިންދަފާތުކޮށް، އަސަރުގަދަ ކޮންޓެންޓާއި މުނިފޫހިފިލުވުމުގެ ވަސީލަތްތައް މެދުވެރިކޮށް ބައިނަލްއަގުވާމީ އޯޑިއަންސަކާ ހަމައަށް ވާސިލުވުމަށް ކުރަމުންދާ މަސައްކަތުގެ ތެރެއިންނެވެ.

މި ޕާޓްނަރޝިޕާ ގުޅޭގޮތުން ވާހަކަދައްކަވަމުން ވިޒިޓް މޯލްޑިވްސް ކޯޕަރޭޝަންގެ ސީ.އީ.އޯ އަދި މެނޭޖިންގ ޑިރެކްޓަރ ޢަބްދުﷲ ޔާސިރު ވިދާޅުވީ، ދިވެހިރާއްޖެއަކީ ރަށްތަކާއި، ކަނޑުފަޅުތަކުގެ އިތުރުން ފުރިހަމަ މެހެމާންދާރީއަށް މުޅި ދުނިޔޭގައި ވެސް މަޝްހޫރު ގައުމެއްކަމަށާއި، އެހެންނަމަވެސް ރާއްޖޭގެ ކެއުންތަކާއި ކާބަފައިންގެ ކަލިނަރީ ތަރިކައަކީ ރާއްޖޭގެ ވާހަކަ ދުނިޔެއަށް ކިޔައިދިނުމަށް ލިބޭ ވަރަށް މުހިންމު އިތުރު ވަސީލަތެއްކަމަށެވެ.

"މާސްޓަރޝެފަކީ މީހުން ދަންނަ އަދި ގަޔާވާ ފޯމެޓެއްގެ ޒަރީއާއިން ދިވެހި ރަހަތަކާއި، ސަގާފަތާއި އަދި އެކަމުގެ ފަހަތުގައިވާ މީހުން ސަރަހައްދީ ފުޅާ އޯޑިއަންސަކަށް ގެނެސްދިނުމަށް ލިބުނު ފޯރިގަދަ ޕްލެޓްފޯމެއް. އޮކްޓޯބަރު 3 ގައި މި އެޕިސޯޑު ދައްކާއިރު، ބެލުންތެރިންނަށް ރާއްޖޭގެ އެހެން ފަރާތެއް ފެނިގެންދާނެ ކަމަށް އުންމީދު ކުރަން."ޢަބްދުﷲ ޔާސިރު

މާސްޓަރޝެފް ސްރީލަންކާގެ ޕްރޮޑަކްޝަން ރާއްޖެއަށް ގެނައުމަށްޓަކައި، ރަށެއްގެ މާހައުލުގައި މާސްޓަރޝެފްގެ ތަޖުރިބާ ވަނީ އަލުން ތަރުތީބުކޮށްފައެވެ. ފަނޑިޔާރުންނާއި، ހޯސްޓް، ބައިވެރިން، ޕްރޮޑަކްޝަން ކްރޫ އަދި ޓެކްނިކަލް ޓީމުތައް ހިމެނޭ ގޮތަށް މުޅި ޓީމު ވަނީ ޝޫޓިންގ އަށް ބޭނުންވާ ސާމާނާއެކު ރާއްޖެ ދަތުރުކޮށްފައެވެ.