ދިވެހި ވަޠަނީ ޚިދުމަތުގެ ފަންނީ ތަމްރީނުގެ 2 ވަނަ ބެޗުގެ 73 ދަރިވަރަކު ދަސްވެނިވެއްޖެއެވެ.

16ހަފްތާއަށް ކުރިއަށްގެންދިޔަ މި ތަމްރީންތަކުގެ ދެވަނަ ބުރުގައި، ރާއްޖޭގެ 17 އަތޮޅުތަކުން ޖުމްލަ 75 ދަރިވަރުން ބައިވެރިވިއެވެ. މީގެ ތެރެއިން 73 ދަރިވަރުން ވަނީ މި ތަމްރީންތައް ފުރިހަމަކޮށްފައެވެ. މީގެ ތެރޭގައި 60 ފިރިހެން ކުދިންނާއި 13 އަންހެން ކުދިން ހިމެނެއެވެ.

Ad by Hajj Corporation

ދިވެހި ވަޠަނީ ޚިދުމަތުގެ ފަންނީ ތަމްރީނަކީ، ދިވެހި ވަތަނީ ޚިދުމަތުގެ ޕްރޮގްރާމްތަކުގެ ތެރެއިން ނޭޝަނަލް ސަރވިސް އިނީޝިއަލް ޓްރެއިނިން ފުރިހަމަކުރާ ދަރިވަރުންނަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގެ ދެވަނަ ބެޗްގެ ކިޔެވުން ކުރިއަށް ގެންގޮސްފައިވަނީ 3 ޖޫން އިން މިއަދަ ހަމައަށެވެ.

މި ތަމްރީން ޕްރޮގްރާމްގެ 3 ވަނަ ބެޗްގެ ތަމްރީންތައްތައް މިމަހުގެ 12 ވަނަ ދުވަހު ފެށުމަށް ވަނީ ހަމަޖެހިފައެވެ.

މި ތަމްރީނުގެ ތެރެއިން 9 މަސްދުވަހުގެ ތެރޭގައި 136 ޒުވާނުން ވަނީ ދަސްވެނިވެފައެވެ. މި ތަމްރީނު ޕްރޮގްރާމް ފުރިހަމަކުރުމުން މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ލެވެލް 3ގެ ސެޓިފިކެޓެއް ހާސިލުކުރެވޭނެއެވެ. މި ޕްރޮގްރާމްގައި ކިޔަވައިދެއްވާފައިވަނީ ފަންނީ ތަފާތު ދާއިރާތަކުގެ ތަޖުރިބާކާރު ސިފައިންގެ އިންސްޓްރަކްޓަރުންނެވެ.

ދިވެހި ވަޠަނީ ޚިދުމަތަކީ ރާއްޖޭގެ ޒުވާނުންގެ މުސްތަޤްބަލު ބިނާކުރުމަށްޓަކައި، ޤައުމީ ރޫޙާއި އިސްލާމީ އަޚްލާޤު ދިރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި ޕްރޮގްރާމެކެވެ.