ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ ކަމަށް ޓޫރިޒަމް މިނިސްޓަރު މުހައްމަދު އަމީން ވިދާޅުވެއްޖެ އެވެ.

ގައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ފަތުރުވެރިކަމާ މިނިސްޓަރު އަމީން ވިދާޅުވީ، ދާދިފަހުން ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ދެއްކުމުގެ އިތުރު ބައިތަކެއް ހިމަނައިގެން ގާނޫނަށް ގެނައި ބަދަލުތަކާ ގުޅިގެން ފަތުރުވެރިކަމުގެ ސިނާއަތުގެ ފަރާތްތަކާއި ޓްރެވަލް އެޖެންޓުންގެ ވަރަށް ބޮޑެތި ކަންބޮޑުވުންތަކެއް ހުރިކަން ސަރުކާރަށް ފާހަގަކުރެވިފައިވާ ކަމަށެވެ.

Ad by Hajj Corporation

މައިގަނޑު ގޮތެއްގައި މި ކަންބޮޑުވުންތައް ގުޅިފައިވަނީ ކަނޑައެޅިފައިވާ މުއްދަތުތަކާއި އެކަމުގައި ހިމެނޭ އެހެނިހެން ސަބަބުތަކާކަމަށް ވިދާޅުވެ، އިންޑަސްޓްރީގެ ފަރާތްތަކުން ހުށަހަޅާފައިވާ ހުށަހެޅުންތަކަށް ރިއާޔަތްކޮށް، ޓީޖީއެސްޓީ ގާނޫނަށް ވަރަށް އަވަހަށް އަވަސް އިސްލާތަކެއް ގެންނެވުމަށް ރައީސް ނިންމަވާފައިވާ ކަމަށް މިނިސްޓަރު އަމީން ވަނީ އިއުލާނުކުރައްވާފައެވެ.

މީގެ އިތުރުން، ދުނިޔޭގެ މަސްރަހަށް އަންނަ ބަދަލުތަކާއި މެދުއިރުމަތީގެ ހަނގުރާމައިގެ ސަބަބުން ބައިނަލްއަގުވާމީ ދަތުރުފަތުރަށް ގޮންޖެހުންތަކެއް ކުރިމަތިވި ނަމަވެސް، ރާއްޖޭގެ ފަތުރުވެރިކަމުގެ ސިނާއަތުން ވިލުންތެރިކަން ދައްކާފައިވާކަން މިނިސްޓަރު ފާހަގަކުރެއްވިއެވެ. އެގޮތުން މިދިޔަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހު ރާއްޖެ އައި ފަތުރުވެރިންގެ އަދަދު އިތުރުވެފައިވާކަމަށާއި، ސެޕްޓެމްބަރު މަހުގެ ނިޔަލަށް 1.57 މިލިޔަން ފަތުރުވެރިން ޒިޔާރަތްކޮށްފައިވާކަން އެމަނިކުފާނު ފާހަގަކުރެއްވިއެވެ. އަދި 2040 ވަނަ އަހަރާ ހަމައަށް ދާންވާއިރަށް ދިވެހިރާއްޖެ ތަރައްގީވެފައިވާ ގައުއުމަކަށް ހެދުމަށް ކުރާ މަސައްކަތުގައި ފަތުރުވެރިކަން ސިންދަފާތު ކުރުމަށް ގިނަ މަސައްކަތްތަކެއް ރާވާފައިވާކަމަށް ވިދާޅުވިއެވެ.

ވާހަކަފުޅު ނިންމަވާލައްވަމުން ވަޒީރު އަމީން ވިދާޅުވީ، 2027 ވަނަ އަހަރަކީ "ވިޒިޓް މޯލްޑިވްސް އިޔަރ" ގެ ގޮތުގައި ކަނޑައަޅާފައިވާ އަހަރެއް ކަމަށެވެ. އެ އަހަރުވެގެންދާނީ ބައިނަލްއަގުވާމީ ވާދަވެރިކަމުގެ ތެރޭގައި ރާއްޖޭގެ މަގާމު އިތުރަށް ހަރުދަނާކޮށް، އެންމެންގެ ޝާމިލުވުން އޮންނަ ގައުމީ ކެމްޕޭނެއްގެ ގޮތުގައި ކުރިއަށް ގެންގޮސް އިގްތިސޯދަށް  ބޮޑު ނަފާއެއް ހޯދައިދޭނެ ފުރުސަތަކަށް ކަމަށްވެސް އެމަނިކުފާނު ވިދާޅުވިއެވެ.