މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމުގެ މަގުސަދުގައި ގައުމީ ފެންވަރުގެ މަޝްރޫއެއް ކަމަށްވާ "ޕްރޮޖެކްޓް ބައޯކަލޯ" ހުޅުމާލޭގައި މިއަދު ރަސްމީކޮށް އިފްތިތާހުކޮށްފިއެވެ. މި މަޝްރޫއަކީ މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި އިޖުތިމާއީ ޖަމިއްޔާތައް ގުޅިގެން ކުރިއަށްގެންދާ ހާއްސަ ހަރަކާތެކެވެ.

"ބައޯކަލޯ" މި ނަމަކީ ދިވެހި ފޯކްލޯރުގައި ބިރުވެރިކަމާ ގުޅުވައިގެން ބޭނުންކުރާ ނަމެއް ނަމަވެސް، މި މަޝްރޫއުގެ ތެރެއިން އެ ނަމަށް ވަނީ އޯގާތެރިކަމާއި ޒިންމާދާރުކަން އަދި ރައްކާތެރިކަން ރަމްޒުކޮށްދޭ އައު މާނައެއް ދީފައެވެ. މި މަޝްރޫއު ބިނާވެފައިވަނީ ކޮންޓްރޯލް، އަޅާލުން، ސާފުތާހިރުކަން، ކޯ-އެގްޒިސްޓް، ކޮމްޕެޝަން އަދި ކެޕޭސިޓީ ހިމެނޭހެން މައިގަނޑު ހަ އަސާސެއްގެ މައްޗަށެވެ. މީގެ މައިގަނޑު އަމާޒަކީ އިންސާނީ އުސޫލުތަކުގެ ތެރެއިން މަގުމަތީ ބުޅަލުގެ އާބާދީ ކޮންޓްރޯލްކޮށް، ސާފުތާހިރު އަދި އޯގާތެރި މާހައުލެއް ގާއިމުކުރުމެވެ.

Ad by Hajj Corporation

ހުޅުމާލޭގައި ފެށި ޕައިލެޓް މަޝްރޫއުގެ ދަށުން، "ޓްރެޕް-ނިއުޓާ-ރިޓާން" (ޓީ.އެން.އާރް) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށްދާނެއެވެ. މީގެ އިތުރުން، ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމާއި، ބުޅާ އެޑޮޕްޓްކުރުމަށް ބާރުއެޅުމުގެ އިތުރުން، "ކެޓް ސޭފް ޕާކް" ތައް ގާއިމުކުރުމާއި އާންމު ހޭލުންތެރިކަން އިތުރުކުރުމުގެ ހަރަކާތްތައް ކުރިއަށް އޮތް އަހަރުގެ ތެރޭގައި ހިންގުމަށް ވަނީ ރޭވިފައެވެ.

މި މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޖަނަވާރުންގެ ހިމާޔަތަށް ދެއްވާ ހާއްސަ އަހަންމިއްޔަތުގެ ދަށުން ކުރިއަށްގެންދާ މަސައްކަތެކެވެ. އެގޮތުން މަގުމަތީ ޖަނަވާރުންގެ މައްސަލަތަކަށް ދާއިމީ ހައްލެއް ހޯދުމަށް ރައްޔިތުންގެ މަޖިލީހުން ފާސްކުރި "ޖަނަވާރުންގެ ހިމާޔަތާއި ރައްކާތެރިކަމުގެ ގާނޫނު" (ގާނޫނު ނަންބަރު: 23/2025) ގެ ދަށުން މިހާރު ވަނީ ޖަނަވާރުންގެ ވެލްފެއާގެ ގައުމީ އޮނިގަނޑެއް އެކުލަވާލާފައެވެ.

މި މަޝްރޫއުގައި ފިޝަރީޒް މިނިސްޓްރީގެ އިތުރުން އެޗްޑީސީ، އަމިއްލަ ޖަމިއްޔާތައް، ވެޓެރިނަރީ ކްލިނިކްތައް، އެނިމަލް ޝެލްޓަރތައް، ސްކައުޓް އަދި ގާލް ގައިޑްގެ އިތުރުން ޕީއެސްއެމް ބައިވެރިވެއެވެ. މުޅި ރާއްޖެއަށް މި ނިޒާމު ފުޅާކުރުމުގެ ތަސައްވުރާއެކު ކުރިއަށްގެންދާ މި މަޝްރޫއުގެ ކާމިޔާބީތައް ދައްކާލުމަށް، 4 އޮކްޓޯބަރު 2027 ގައި ފާހަގަކުރާ ދުނިޔޭގެ ޖަނަވާރުންގެ ދުވަހާ ގުޅުވައިގެން ބޮޑު ހަރަކާތެއް ބޭއްވުމަށް ވަނީ އަމާޒު ހިފާފައެވެ.