އަމިއްލަ އުޅަނދުފަހަރުގައި އެއްވެސް ލިމިޓެއް ނެތި ގާކުނޑި (ސީއެންޑީ ވޭސްޓް) އުކާލެވޭނެ އިންތިޒާމު ވެމްކޯ އިން ހަމަޖައްސައިފިއެވެ.

ވެމްކޯ އިން ބުނީ މި ހިދުމަތް މިހާރަށްވުރެ ހަލުވި އަދި ލުއިފަސޭހަ ނިޒާމެއްގެ ދަށުން ފޯރުކޮށްދިނުމަށް މިއަދުން ފެށިގެން އަމިއްލަ އުޅަނދުތަކުގައި ވެމްކޯގެ މާލެ އަދި ހުޅުމާލޭގެ ރިސޯސް ރިކަވަރީ ފެސިލިޓީތަކަށް ގާކުނޑި ގެންގޮސްގެން، އެއްވެސް ލިމިޓެއް ނެތި އުކާލެވޭނެ އިންތިޒާމު ހަމަޖައްސާފައިވާ ކަމަށެވެ.

Ad by Hajj Corporation

ނަމަވެސް މިގޮތަށް ގެންނަ ކުނި ހުންނަންވާނީ އެ ކޯޕަރޭޝަނުން ކަނޑައަޅާފައިވާ އުސޫލުތަކާ އެއްގޮތަށް ވަކިކޮށްފައި ކަމަށް ވެމްކޯ އިން ބުނެފައިވެއެވެ.

މާލެ އަދި ހުޅުމާލޭގައި ދިރިއުޅޭ ރައްޔިތުންނަށް ގާކުނޑި އުކާލުމުގައި ދަތިތައް ދިމާވާތީ މީގެކުރިން ވަރަށް ގިނަ ބަޔަކު ދިޔައީ ޝަކުވާ ކުރަމުންނެވެ. ވެމްކޯ އިން މީގެކުރިން ދިޔައީ ގާކުނޑި އުކާލަން ބޭނުންވާ މީހުންނަށް އެ ހިދުމަތް ފޯރުކޮށްދެމުންނެވެ.

ވެމްކޯ، 2017 ވަނަ އަހަރު ވުޖޫދަށް އައުމާއެކު، މާލެ ހިމެނޭހެން މިހާރު ރާއްޖޭގެ ވަރަށް ގިނަ ރަށްރަށުގައި އަންނަނީ ކުނި އުކާލުމުގެ ހިދުމަތް ދެމުންނެވެ. ކުނިއުކުމުން ފެށި އެ ކުންފުނިން މިހާރު ރިސޯޓުތަކުން ކުނި ނެގުމުގެ މަސައްކަތާއި ފޮޅާ ސާފު ކުރުމުގެ މަސައްކަތް ކުރެއެވެ.

އެ މަސައްކަތްތައް މުޅިން ވެސް ކުރަނީ ވެމްކޯގެ މުވައްޒަފުންނެވެ.