އިންތިގާލީ އިންސާފުގެ އޮފީހަށް ހުށަހެޅި މައްސަލަތަކަށް ގާނޫނީ ހައްލުތަކެއް ހޯދައިދިނުމުގެ ގާނޫނީ ހައިސިއްޔަތެއް މިވަގުތު ސަރުކާރުގައި ނެތް ކަމަށް ބަންޑާރަނައިބް އަހްމަދު އުޝާމު މިރޭ ވިދާޅުވެއްޖެ އެވެ.

އިންތިގާލީ އިންސާފުގެ އޮފީހަކީ ރައީސް އިބްރާހީމް މުހައްމަދު ސޯލިހްގެ ސަރުކާރުގައި އުފެއްދެވި އޮފީހެކެވެ. ރައްޔިތުންގެ މަޖިލީހުން ފާސްކުރި ގާނޫނެއްގެ ދަށުން 2021 ވަނަ އަހަރު އެ އޮފީސް އުފެއްދެވީ އެއް އަހަރުގެ ތެރޭގައި މައްސަލަތައް ބަލާ ނިންމާ ގޮތަށެވެ. އަދި އެ މުއްދަތުގެ ތެރޭގައި މައްސަލަތައް ބަލައި ނުނިމެއްޖެނަމަ އިންތިގާލީ އިންސާފުގެ އޮފީހުގެ މުއްދަތު އިތުރުކުރުމުގެ ބާރު ގާނޫނޫގައި ރައީސުލްޖުމްހޫރިއްޔާއަށް ލިބިދީފައިވެ އެވެ. ނަމަވެސް ރައީސް ސޯލިހް 2022 ވަނަ އަހަރުގެ ތެރޭގައި އިންތިގާލީ އިންސާފުގެ އޮފީހުގެ މުއްދަތު އިތުރުކުރީ 17 ނޮވެމްބަރު 2023ގެ ނިޔަލަށެވެ.

ވަޒީރުންގެ އަހާ ފޯރަމުގައި އިންތިގާލީ އިންސާފުގެ އޮފީހަށް މައްސަލަ ހުށަހެޅި މީހަކު، އިންސާފު ނުލިބި ގިނަ ދުވަސްވާތީ ކުރި ސުވާލަކަށް ޖަވާބު ދެއްވަމުން އުޝާމު ވިދާޅުވީ އެ އޮފީހަށް ހުށަހެޅި މައްސަލަތަކަށް ހައްލު ހޯދައިދިނުމުގެ ގާނޫނީ ހައިސިއްޔަތެއް ސަރުކާރަށް މިވަގުތު ނެތް ކަމަށެވެ. އެހެންނަމަވެސް ގާނޫނެއް އުފަންކޮށްގެން ނަމަވެސް އެ މައްސަލަތަކަށް ހައްލެއް ހޯދައިދިނުމަށް ރައީސް ޑރ. މުހައްމަދު މުއިއްޒުގެ ސަރުކާރުން މަސައްކަތްތަކެއް ކުރައްވަމުން ގެންދަވާ ކަމުގައި ވިދާޅުވި އެވެ.

"17 ނޮވެމްބަރު 2023އާ ހަމައަށް މުއްދަތު އިތުރުކުރެއްވިއިރުގައި ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރުގައި އެ ގާނޫނުގެ މުއްދަތު ހަމަވެފައި އޮތީ. މާނައަކީ އެ ގާނޫނުގެ ދަށުން ދެން އަޅުގަނޑުމެންނަށް އިތުރު އެއްވެސް ފިޔަވަޅެއް އެޅޭ ގޮތަކަށް ނޫން އެކަން ކުރައްވާފައި އޮތީކީ،" އުޝާމު ވިދާޅުވި އެވެ.

ބަންޑާރަނައިބް ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު އިންތިގާލީ އިންސާފުގެ އޮފީހަށް ހުށަހެޅުނު މައްސަލަތަކާ މެދު ގޮތްތަކެއް ނިންމުމަށް ބަންޑާރަނައިބުގެ އޮފީހަށް ހުށަހެޅި ކަމަށެވެ. އެހެންވެ އޭރު ފިނޭންސް މިނިސްޓްރީގައި ހުރި އިންތިގާލީ އިންސާފުގެ އޮފީހުގެ ހުރިހާ ލިޔެކިޔުންތަކެއް ހޯދައި ބެލިއިރު އިންތިގާލީ އިންސާފުގެ އޮފީހަށް ލިބުނު ދެ އަހަރުގެ ތެރޭގައި އެއްވެސް މައްސަލައެއް އެއްކޮށް ނިންމާފައި ނެތްކަން ފާހަގަކުރެވުނު ކަމަށް ބަންޑާރަނައިބް ވިދާޅުވި އެވެ.

"މާނައަކީ ތަހުގީގު ފުރިހަމަކުރުމަށްފަހު ގާނޫނުގައި އެ ބުނާ އިޖުރާއަތްތަކާ އެއްގޮތްވާ ގޮތުގެ މަތިން އެއްވެސް ބޭފުޅަކަށް ބަދަލު ދޭންޖެހޭ ކަމަށް ނިންމާފައި އޮތް މައްސަލަތަކުގައިވެސް ބަދަލު ދިނުމާއި އެ ޕްރޮސެސް ފުރިހަމަނުކޮށް އޮތީ،" ބަންޑާރައިބް ވިދާޅުވި އެވެ.

އުޝާމު ވިދާޅުވީ އިންތިގާލީ އޮފީހުގައި 400 އަށް ވުރެ ގިނަ މައްސަލަ އޮތް ކަމަށާއި އެ މައްސަލަ ބަންޑާރަނައިބުގެ އޮފީހުން އެ މައްސަލަތައް ބެލުމަށް ރައީސް މުއިއްޒު އެންގެވިއިރު އެ އޮފީހަކީ ތަހުގީގު ހިންގުމުގެ ބާރު އޮތް މުއައްސަސާއެއް ނޫން ކަމަށެވެ. އެހެންކަމުން އެ މައްސަލަތަކަށް ގާނޫނީ ހައްލެއް ހޯދަންޖެހޭ ކަމަށާއި އެކަމަށް ވަގުތުކޮޅެއް ނަގާނެ ކަމުގައިވެސް ވިދާޅުވި އެވެ.

ބަންޑާރަނައިބް ވިދާޅުވީ އިންތިގާލީ އިންސާފުގެ އޮފީހަށް ހުށަހެޅުނު ބައެއް މައްސަލަތަކާ ގުޅިގެން ބައެއް މީހުންނަށް ބަދަލު ދީފައިވާކަންވެސް ފާހަގަކުރެވިފައިވާ ކަމަށެވެ. އެކަމަކު އެކަންކޮށްފައިވާ ގޮތެއް އެނގިވަޑައިނުގަންނަވާ ކަމުގައިވެސް ވިދާޅުވި އެވެ.

Ad by Hajj Corporation