ރާއްޖޭގައި ރިޒޯޓުތައް 99 އަހަރަށް ކުއްޔަށް ދޫކުރަން ފެށީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ކަމަށާއި، ރަސްމާލެ މަޝްރޫޢު ކުރިއަށްދާނީ ޤާނޫނުގެ ތެރެއިން ކަމަށް ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

ބަންޑާރަނައިބު މިހެން ވިދާޅުވީ، ރަސްމާލެއިން 99 އަހަރަށް ބޭރުގެ ބަޔަކަށް ބިން ދިނުމަކީ ދާއިމީކޮށް އެ ބިން ވިއްކާލުން ކަމަށާއި، އެކަން ހުއްޓާނުލައިފި ނަމަ ސަރުކާރު ބަދަލުވުމާއެކު އެކަމުގައި ބައިވެރިވި އިސްވެރިންނަށް އަދަބު ދޭނެ ކަމަށް ވިދާޅުވެ ރައީސް ޔާމީން ދެއްވި އިންޒާރަކާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ. އުޝާމް ވިދާޅުވީ ރައީސް ޔާމީން މިއަދު އެކަން ހަނދުމަފުޅު ނެތީ ކަމަށް ވެދާނެ ކަމަށާއި، ނަމަވެސް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ އެމަނިކުފާނުގެ ވެރިކަމުގައި ކަމަށެވެ.

Ad by Hajj Corporation

ރާއްޖޭގައި ރިޒޯޓުތައް ކުއްޔަށް ދިނުމުގެ ތާރީޚަށް އަލިއަޅުއްވާލައްވަމުން އުޝާމް ވިދާޅުވީ، 1999 ވަނަ އަހަރު އެންމެ ފުރަތަމަ ޓޫރިޒަމާ ބެހޭ ޤާނޫނު އެކުލަވާލިއިރު ރިޒޯޓުތައް ދޫކުރަމުން އައީ ގިނަވެގެން 25 އަހަރަށް ކަމަށެވެ. އަދި 2010 ވަނަ އަހަރު ރައީސް މުޙައްމަދު ނަޝީދުގެ ވެރިކަމުގައި ގެނައި އިސްލާހަކުން އެ މުއްދަތު 50 އަހަރަށް އިތުރުކުރި ކަމަށާއި، އޭގެ ފަހުން 2015 ވަނަ އަހަރު ރައީސް ޔާމީންގެ ވެރިކަމުގައި އެ މުއްދަތު 99 އަހަރަށް އިތުރުކޮށްފައިވާ ކަމަށް އޭނާ ފާހަގަކުރެއްވިއެވެ.

މީގެ އިތުރުން، ޓޫރިޒަމާބެހޭ ޤާނޫނުގެ 8 ވަނަ މާއްދާގައިވާ ގޮތުން، 99 އަހަރުގެ މުއްދަތު ހަމަވުމުން އެ ރަށެއްގައި ކޮށްފައިވާ އިންވެސްޓްމަންޓުގެ އަގުން ބާކީވާ އަގު އިންވެސްޓްކުރި ފަރާތަށް ސަރުކާރުން ދައްކަންޖެހޭކަން ވެސް ބަންޑާރަނައިބު ފާހަގަކުރެއްވިއެވެ.

ރަސްމާލެ މަޝްރޫޢާ ގުޅޭގޮތުން އުޝާމް ވިދާޅުވީ، އެ މަޝްރޫޢު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. އަދި މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި ކަމަށާއި، މަޝްރޫޢު ފެށުމުގެ ކުރިން އެ އެއްބަސްވުމުގެ ޓާމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން، ކަމާ ގުޅުންހުރި ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށް ވިދާޅުވިއެވެ.

އުޝާމް ވަނީ ރަސްމާލެ މަޝްރޫޢު ކުރިއަށް ގެންދިއުމުގައި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް މި ސަރުކާރުން ނުކުރާނެ ކަމުގެ ޔަޤީންކަން ދެއްވާފައެވެ.