އޮގަސްޓް މަހު ރާއްޖޭގެ އިޤްތިސާދީ ކުރިއެރުން ހުރީ 9.64 ބިލިޔަން ރުފިޔާގައި ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސްހިސާބުތަކުން ދައްކައިފިއެވެ.

މިއީ މިދިޔަ އަހަރުގެ އެ މުއްދަތުގައި ހުރި 9.41 ބިލިޔަން ރުފިޔާއާ އަޅާބަލާއިރު އިތުރުވުމެކެވެ. އަދި މިއީ 2026 ވަނަ އަހަރުގެ ޖުލައި މަހާ އަޅާބަލާއިރު 5.4 އިންސައްތައިގެ ކުރިއެރުމެކެވެ.

Ad by Hajj Corporation

އިޤްތިސާދީ ކުރިއެރުމަށް އެންމެ ބޮޑު ހިއްސާއެއް ވެފައިވަނީ މާލީ ޚިދުމަތްތަކުގެ ދާއިރާއިންނެވެ. މީގެ އިތުރުން ރިއަލް އެސްޓޭޓް ހަރަކާތްތަކާއި ހޯލްސޭލް އަދި ރީޓެއިލް ވިޔަފާރީގެ ދާއިރާއިން ވެސް ބޮޑު ކުރިއެރުމެއް ހޯދާފައިވާ ކަމަށް ރިޕޯޓުގައި ފާހަގަކޮށްފައިވެއެވެ.

ތަފާސްހިސާބުތަކުން ދައްކާ ގޮތުގައި މާލީ ޚިދުމަތްތަކުގެ ދާއިރާ ވަނީ 21.9 އިންސައްތަ ކުރިއަރައި، 748 މިލިޔަން ރުފިޔާއަށް އިތުރުވެފައެވެ. މިއީ މާލީ މުއާމަލާތްތަކާއި އިންޝުއަރެންސްގެ ހިދުމަތްތައް އިތުރުވުމާ ގުޅިގެން އައި ބަދަލެކެވެ. މީގެ އިތުރުން ހޯލްސޭލް އަދި ރީޓެއިލް ވިޔަފާރި 8.1 އިންސައްތަ ކުރިއަރައި 864 މިލިޔަން ރުފިޔާއަށް އަރާފައިވާއިރު، އިމާރާތްކުރުމުގެ ދާއިރާ ވަނީ 10.4 އިންސައްތަ ކުރިއަރައި 487 މިލިޔަން ރުފިޔާއަށް އަރާފއެވެ.

ހޮސްޕިޓާލިޓީ އަދި ފުޑް ސާވިސަސް ދާއިރާއިން 2.23 ބިލިޔަން ރުފިޔާ އުފައްދާފައިވާއިރު، މިއީ މިދިޔަ އަހަރުގެ އޮގަސްޓު މަހާ އަޅާބަލާއިރު 0.7 އިންސައްތައިގެ ކުރިއެރުމެކެވެ. އަދި މިއީ މިއަހަރުގެ ޖުލައި މަހާ އަޅާބަލާއިރު 10.6 އިންސައްތައިގެ ކުރިއެރުމެކެވެ. މި ކުރިއެރުން އައިސްފައިވަނީ ފަތުރުވެރިން ރާއްޖޭގައި ހޭދަކުރި ރޭގެ އަދަދު އިތުރުވުމާ ގުޅިގެން ކަމަށް ރިޕޯޓުގައި ބުނެފައިވެއެވެ.

ދަތުރުފަތުރާއި މުއާސަލާތީ ޚިދުމަތްތަކުގެ ދާއިރާއަކީ އިޤްތިޞާދުގެ 11.7 އިންސައްތަ ހިއްސާކުރާ ދާއިރާއެވެ. މި ނިމިދިޔަ އޯގަސްޓު މަހުގެ އިޤްތިޞާދީ ކުރިއެރުން 10.06 ބިލިޔަން ރުފިޔާއަށް އަރާފައިވާއިރު، މިއީ ޖަނަވަރީ މަހުގެ ފަހުން އިޤްތިޞާދީ ކުރިއެރުން މިހާ މަތީ މިންވަރަކަށް ރިކޯޑުކުރެވުނު ފުރަތަމަ ފަހަރެވެ. މީގެއިތުރުން، މިއީ 2024 ވަނަ އަހަރުގެ އޯގަސްޓު މަހު ރިކޯޑުކުރެވުނު 8.6 ބިލިޔަން ރުފިޔާއާ އަޅާބަލާއިރު 11.4 އިންސައްތައިގެ ކުރިއެރުމެއްކަމަށް މި ރިޕޯޓުގައި ވަނީ ބުނެފައެވެ.

ތަފާސްހިސާބުތަކުން ދައްކާގޮތުގައި، ޖޫން މަހު އިޤްތިޞާދީ ހަރަކާތްތައް ދަށްވުމަށްފަހު، ޖުލައި އަދި އޮގަސްޓު މަހު ރާއްޖޭގެ އިޤްތިޞާދީ ހަރަކާތްތައް ވަނީ ބާރުމިނެއްގައި ކުރިއަރަން ފަށާފައެވެ.