ރޭޕްކުރިކަމަށް ކުރި 15 އަހަރުގެ ހުކުމް ހައިކޯޓުން ދަމަހައްޓައިފި

ފުރަތަމަ ދެލިކޮޕީ | 17 އޮކްޓޫބަރު 2026

Ad by Hajj Corporation

އަންހެނަކު ރޭޕްކުރިކަމަށް ސާބިތުވެގެން ގދ. ވާދޫ، ޞަބާހީމަންޒިލް، އިޒާމް ޒާހިރަށް ކްރިމިނަލް ކޯޓުން ކުރި 15 އަހަރުގެ ޖަލު ހުކުމް، ހައިކޯޓުން ދަމަހައްޓައިފި އެވެ.

އިޒާމް ޒާހިރު ވ. ޕްރޮސިކިއުޓަރ ޖެނެރަލް (‪2026/HC-A/121) ގަޒިއްޔާ ހައިކޯޓުން ނިންމީ 15 އޮކްޓޫބަރު 2026 ގައި، މައްސަލަ ބެލި ތިން ފަނޑިޔާރުންގެ ގިނަ ރައުޔުންނެވެ. ދެ ފަނޑިޔާރުން ވަނީ ކްރިމިނަލް ކޯޓުގެ ހުކުމް ބާތިލުކުރަން ނުޖެހޭ ކަމަށް ނިންމާފައެވެ. ބެންޗުގެ ރިޔާސަތު ބެލެހެއްޓެވި ފަނޑިޔާރު ވަނީ ދަށު ކޯޓުގެ ހުކުމް ބާތިލުކުރަން ފެންނަ ކަމަށް ތަފާތު ރައުޔެއް ދީފައެވެ. މި ނިންމުމާއެކު، ހުކުމް ކުރުމުގެ ކުރިން ބަންދުގައި ހޭދަކުރި މުއްދަތު އުނިކޮށް، އިޒާމް ޒާހިރަށް ކަނޑައެޅި 15 އަހަރުގެ ޖަލު ހުކުމް ދެމިއޮންނާނެއެވެ.

ދައުލަތުން ކުރި ދައުވާގައި ބުނެފައިވަނީ، 2 އޮކްޓޫބަރު 2018 ގެ ރޭގަނޑު، ރާއްޖޭގެ ރަށެއްގައި ހުރި ގެއެއްގެ ކޮޓަރިއެއްގައި އިޒާމް ޒާހިރު އަންހެނަކު ރޭޕްކުރި ކަމަށެވެ.

ޖިންސީ ކުށުގެ ގާނޫނުގެ 14 ވަނަ މާއްދާގެ ދަށުން ކުރި މި ދައުވާ، ކްރިމިނަލް ކޯޓަށް ހުށަހެޅީ 27 ނޮވެންބަރު 2025 ގައެވެ. އިޒާމް ޒާހިރު ދައުވާއަށް އިންކާރުކުރި ނަމަވެސް، 30 ޑިސެންބަރު 2025 ގައި ކްރިމިނަލް ކޯޓުން ވަނީ ކުށް ސާބިތުވާ ކަމަށް ނިންމާފައެވެ. އެ ކޯޓުން ބުރަވީ، ހާދިސާގެ ވަގުތު ތަނަށް ދިޔަ، ޝަކުވާކުރި މީހާގެ ދެ ގާތްތިމާގެ މީހުންގެ ހެކިބަހާއި، ޝަކުވާކުރި މީހާގެ މޭމަތިން ނެގި ސާމްޕަލުގައި އިޒާމް ޒާހިރުގެ ޑީ.އެން.އޭ ހުރުމާއި، އޭނާގެ ކަރާއި ކަންފަތުން ނެގި މިކްސްޑް ޑީ.އެން.އޭ ޕްރޮފައިލް، ދެ ސައިޓް ފިޔަވައި އެހެން ހުރިހާ ސައިޓެއްގައި އިޒާމް ޒާހިރުގެ ޕްރޮފައިލާ ދިމާވުމަށެވެ.

ހައިކޯޓުގައި ކުރި އިސްތިއުނާފުގައި އިޒާމް ޒާހިރުގެ ފަރާތުން ބުނީ، ގާނޫނުގައިވާ ގޮތުން ރޭޕްކުރުމަކީ ރުހުމާ ނުލައި ޖިންސީ ގުނަވަން ވެއްދުން ކަމަށާއި، އެކަން ސާބިތުވާ ހެކި ނެތް ކަމަށެވެ. ޝަކުވާކުރި މީހާގެ ފަރުޖުން ނެގި ސާމްޕަލުގައި އޭނާގެ ޑީ.އެން.އޭ ނުފެނޭ ކަމަށާއި، ހަށިގަނޑުގެ އެހެން ދިމާތަކުން ފެނުނު ޑީ.އެން.އޭ އަކީ ރޭޕް ސާބިތުކުރާ ހެއްކެއް ނޫން ކަމަށާއި، ދެ ހެކިވެރިންނަށްވެސް އެ ޢަމަލު ފެނިފައި ނުވާ ކަމަށް ދިފާއުގައި ބުނެއެވެ. މިއީ މުޙައްމަދު ނިޔާޒު ވ. ޕްރޮސިކިއުޓަރ ޖެނެރަލްގެ އޮފީސް (‪2021/SC-A/83) ގަޒިއްޔާގައި ސުޕްރީމް ކޯޓުން ކަނޑައަޅާފައިވާ އުސޫލާ ޚިލާފު ކަމަށްވެސް ދިފާއުން ބުނެއެވެ. އަދި ޝަކުވާކުރި މީހާގެ ބަހުގެ އިތުބާރާމެދު ސުވާލު އުފެދޭ ކަމަށާއި، ރޭޕްގެ ކުށް ސާބިތުކުރަންވާނީ އާންމު މިންގަނޑަށްވުރެ މަތީ މިންގަނޑަކުން ކަމަށްވެސް ބުންޏެވެ.

ދައުލަތުން ބުނީ ފަރުޖުން ޑީ.އެން.އޭ ނުފެނުމަކީ ކުށް ސާބިތުކުރުމަށް ހުރަހެއް ނޫން ކަމަށާއި، ޑީ.އެން.އޭ އާއި ދެ ހެކިވެރިންގެ ހެކިބަހުން ޝަކުވާކުރި މީހާގެ ބަހަށް ބާރުލިބޭތީ ހުކުމަކީ ގާނޫނާ އެއްގޮތަށް ކުރި ހުކުމެއް ކަމަށެވެ.

ރޭޕްގެ ކުށް ސާބިތުކުރުމާ ބެހޭ ގާނޫނީ އުސޫލުތަކާމެދު ތިން ފަނޑިޔާރުން ވެސް އެއްބަސްވެވަޑައިގަންނަވައެވެ. ޖިންސީ ކުށުގެ ގާނޫނުގެ 52 ވަނަ މާއްދާއިން މިފަދަ މައްސަލަތަކުގައި ހެކީގެ މިންގަނޑު ލުއިކޮށްފައިވާ ކަމަށާއި، ހާދިސާ ލޮލަށް ފެނުނު މީހަކު ނެތް ނަމަވެސް ޝިކާރައަށްވި މީހާގެ ހެކިބަހަކީ މައިގަނޑު އަސާސް ކަމަށް ބަލައި، މެޑިކަލް ނުވަތަ ސައިންޓިފިކް ހެއްކަކުން އެ ބަހަށް ބާރުލިބޭނަމަ ކުށް ސާބިތުކުރެވޭނެ ކަމަށް ހުކުމުގައި ބަޔާންކޮށްފައިވެއެވެ. ޑީ.އެން.އޭ ހެއްކަކީ އެކަނި ރޭޕް ސާބިތުކުރާ ހެއްކެއް ނޫން ކަމަށާއި، އެ ހެއްކަށް ބާރުދޭ އިތުރު ހެއްކެއް ބޭނުންވާ ކަމަށްވެސް ހުކުމުގައިވެއެވެ. ފަނޑިޔާރުންގެ ތަފާތުވީ، މި މައްސަލައިގެ ހެކިތަކަށް އެ އުސޫލުތައް ތަތުބީގުކުރުމުގައެވެ.

ގިނަ ރައުޔު ލިޔުއްވީ ފަނޑިޔާރު ޙުޒައިފާ މުޙައްމަދެވެ. ޝަކުވާކުރި މީހާ ތަހުގީގަށާއި، އިޖުތިމާއީ ހާލަތު ވަޒަންކުރި ފަރާތަށާއި، ކޯޓަށް ކިޔައިދިން ތިން ތަނުގައިވެސް ވާހަކައިގައި ފުށުއެރުމެއް ނެތް ކަމަށް އެ ރައުޔުގައި ބުނެއެވެ. ހެކިވެރިއަކު އެ ގެއަށް ވަދެވުނު އިރު ޝަކުވާކުރި މީހާ ރޯ އަޑު އިވުނު ކަމަށާއި، އިޒާމް ޒާހިރު އޭނާގެ އަތުގައި ހިފަހައްޓައިގެން ހުރި ކަމަށް ހެކިބަސް ދީފައިވާއިރު، އަނެއް ހެކިވެރިޔާ ބުނީ ޝަކުވާކުރި މީހާ ކޮށްޕަމުން ދިޔަ ކަމަށެވެ. ޑީ.އެން.އޭ ތަހުލީލުން އިޒާމް ޒާހިރުގެ ބޮކްސަރުން މަނީގެ އަސަރު ފެނުނު ކަމަށާއި، މޭމަތިން ފެނުނު ޑީ.އެން.އޭ އަކީ ޝަކުވާކުރި މީހާގެ ބަހަށް ބާރުދޭ ސައިންޓިފިކް ހެއްކެއް ކަމަށްވެސް އެ ރައުޔުގައި ބުނެއެވެ. ފަރުޖުން ޑީ.އެން.އޭ ނުފެނުމާ ބެހޭ ގޮތުން ފަނޑިޔާރު ޙުޒައިފާ ފާހަގަކުރެއްވީ، ވަގުތު ގޮސްފައިވުމާއި ދޮވުން ފަދަ ސަބަބުތަކާހުރެ އެގޮތަށް ވެދާނެ ކަމަށް ތަހުލީލުކުރި ފަރާތުން ހެކިބަސް ދީފައިވާތީ، އެއީ ހާދިސާ ނުހިނގާ ކަން ދައްކާ ކަމެއް ނޫން ކަމަށެވެ. އަދި ރުހުން ދެމިއޮތް ކަމަށް ކުރިން ހިނގާފައިވާ ކަމަކަށް ބަލައިގެން ބެލޭނެ ގޮތެއް ނެތް ކަމަށާއި، އެއްވެސް ވަގުތެއްގައި އިންކާރުކުރެވިދާނެ ކަމަށްވެސް އެ ރައުޔުގައި ބުނެއެވެ. ފަނޑިޔާރު ޢަބްދުއްރައޫފު އިބްރާހީމް ވަނީ މި ރައުޔަށް ތާއީދުކުރައްވާފައެވެ.

ތަފާތު ރައުޔު ދެއްވި ރިޔާސަތު ފަނޑިޔާރު ޙުސައިން މަޒީދު ވިދާޅުވީ، ދައުލަތުން ކުރީ ރޭޕްކުރުމުގެ ދައުވާ ކަމަށާއި، ހެކިތައް ގުޅުވާލެވެންވާނީ އެ ކުށުގެ އުންސުރުތަކާ ކަމަށެވެ.

"މި މައްސަލައިގައި މިދެކެވެނީ ‹ރޭޕްކުރުމުގެ› ކުށުގެ ވާހަކައެވެ. ޖިންސީ ގޯނާގެ ކުށުގެ ވާހަކައެއް ނޫނެވެ،" އެ ރައުޔުގައި ބުނެއެވެ.

ކަރާއި ކަންފަތާއި މޭމަތިން ފެނުނު ޑީ.އެން.އޭ އަކީ ވެއްދުމުގެ ޢަމަލު ސާބިތުކުރަން ގުޅުވާލެވޭ ހެއްކެއް ނޫން ކަމަށާއި، ދެ ހެކިވެރިންނަށްވެސް އެ ޢަމަލު ފެނިފައި ނުވާ ކަމަށް ފަނޑިޔާރު މަޒީދު ފާހަގަކުރެއްވިއެވެ. ހެކިވެރިޔަކަށް ރޯ އަޑު އިވުނު ނަމަވެސް، އަނެކަކަށް އެއްވެސް އަޑެއް ނީވޭ ކަމަށް ބުނެފައިވާއިރު، އެ ވަގުތު އާއިލާގެ މީހުން އައުމުން ދެކޮޅުހެދުމަކީ އެކަށީގެންވާ ކަމެއް ކަމަށްވާތީ، ރުހުން ނެތް ކަމާމެދު އެކަށީގެންވާ ޝައްކެއް އުފެދޭ ކަމަށް އެ ރައުޔުގައި ބުނެއެވެ. އެ ނިންމުމަކީ ޝަކުވާކުރި މީހާގެ އަޚުލާގަށް ބަލައިގެން ނިންމި ނިންމުމެއް ނޫން ކަމަށްވެސް ފަނޑިޔާރު މަޒީދު ވަނީ ބަޔާންކުރައްވާފައެވެ.

މި މައްސަލަ ބެލީ ހައިކޯޓުގެ ފަނޑިޔާރު ޙުސައިން މަޒީދު (ރިޔާސަތު)، ފަނޑިޔާރު ޙުޒައިފާ މުޙައްމަދު އަދި ފަނޑިޔާރު ޢަބްދުއްރައޫފު އިބްރާހީމެވެ. އިޒާމް ޒާހިރުގެ ފަރާތުން ހައިކޯޓުގައި ތަމްސީލުކުރީ ޙުސްނުއްސުޢޫދު އެވެ. ދައުލަތުގެ ފަރާތުން މައްސަލައިގައި ތަމްސީލުކުރީ ދެ ސީނިއަރ ޕަބްލިކް ޕްރޮސިކިއުޓަރުންނެވެ.