ހިޒްބުﷲގެ ކުރީގެ ލީޑަރު ހަސަން ނަސްރުﷲ މަރާލަން ބެއިރޫތުގެ ދެކުނުގެ އަވަށްތަކަށް ދިން ވައިގެ ހަމަލާއެއްގައި އެ ޖަމާއަތުގެ އިސް ދީނީ އިލްމުވެރިއެއް ކަމަށްވާ ހާޝިމް ސަފީދީންވެސް މަރާލާފައިވާކަން އިސްރާއީލުން އިއުލާނުކޮށްފިއެވެ.

އިސްރާއީލުގެ ޑިފެންސް ފޯސަސް (އައިޑީއެފް) އިން ވަނީ ސަފީދީން މަރުވިކަން ކަށަވަރުކޮށްދީ، ހިޒްބުﷲގެ އިންޓެލިޖެންސް ހެޑްކުއާޓާސް ކޮމާންޑަރު އަލީ ހުސައިން ހާޒިމާ ވެސްމަރާލާފައެވެ. ސަފީދީން އަކީ އިސްރާއީލާ ދެކޮޅަށް ޓެރަރިސްޓް ހަމަލާތައް ދޭން ރާވައި، ހިޒްބުﷲ ނިންމުންތައް ނިންމުމުގައި ވަރަށް މުހިންމު ނަސްރުاللهއަށް ފަހު ހިޒްބުﷲގެ ލީޑަރަކަށްވުން ގާތް މީހާކަމަށް އިސްރާއީލުން ތުހުމަތުކުރެއެވެ.

ސަފީދީން މަރުވިކަން ހިޒްބުالله އިން އަދި ކަށަވަރުކޮށްދީފައެއް ނުވެއެވެ. ނަމަވެސް މިދިޔަ އޮކްޓޯބަރު މަހުގެ ހަތަރު ވަނަ ދުވަހު ބެއިރޫތުގެ އެއާޕޯޓު ކައިރިން ދިން ވައިގެ ހަމަލާތަކާ ގުޅިގެން ހިޒްބުاللهގެ އޮފިޝަލުން އޭނާއާ ގުޅުން ކެނޑިފައިވާކަމަށް ރިޕޯޓްކޮށްފައިވާއިރު، އިސްރާއީލިގެ މަސްދަރުތަކުން ވަނީ ހަމަލާގެ ޓާގެޓަކީ އޭނާ ކަމަށް ދޭހަވާ މޭރުމަކުން އިޝާރާތްކޮށްފަ އެވެ.

އުމުރުން ގާތްގަނޑަކަށް 60 އަހަރުގެ ސަފީދީން އަކީ ނަސްރުاللهގެ އެއްބަނޑު އެއްބަފާ ބޭފުޅެއްގެ އިތުރުން އީރާނާ ވަރަށް ގާތް ގުޅުމެއް އޮންނަ މީހެކެވެ. އޭނާ އަކީ 2017 ވަނަ އަހަރު އެމެރިކާ އާއި ސައުދީ އަރަބިއްޔާއިން "ގްލޯބަލް ޓެރަރިސްޓެއް" ގެ ގޮތުގައި ކަނޑައެޅި މީހެކެވެ.

ޣައްޒާގައި ގާތްގަނޑަކަށް އަހަރެއްހާ ދުވަސް ވަންދެން ހިނގި ހަމަނުޖެހުންތަކަށް ފަހު، ލުބުނާނާއި އިސްރާއީލުގެ އުތުރުން އެތައް ހާސް ބަޔަކު ވަނީ މަރުވެފަ އެވެ. އިސްރާއީލުން ހިޒްބުاللهއާ ދެކޮޅަށް ހިންގާ އޮޕަރޭޝަންތައް ވަރުގަދަކުރަމުން އަންނައިރު، ސަރަރަހައްދީ ހަމަނުޖެހުންތައް އަންނަނީ އިތުރުވަމުންނެވެ.