ރާއްޖެއިން ބޭރުގައި ކިޔަވާ ދަރިވަރުންނަށް ކޮންމެ މަހަކު ނެގޭ ޑޮލަރު ލިމިޓު، 1200 އަށް ބޮޑުކުރުމަށް ބޭންކް އޮފް މޯލްޑިވްސް (ބީއެމްއެލް) އިން ނިންމައިިފިއެވެ.

ބީއެމްއެލް އިން އެ ބަދަލު ގެނައުމަށް ނިންމާފައިވަނީ މި އަންނަ މަހުގެ އެކަކުން ފެށިގެންނެވެ.

އެގޮތުން ބޭންކް އިން ނެރުނު ބަޔާނެއްގައި، އެ ބޭންކުގެ ފުރަތަމަ ދިވެހި ސީއީއޯ މުޙައްމަދު ޝަރީފުް ވިދާޅުވީ، ރާއްޖެއަށް ޑޮލަރުގެ ތާށިކަން ދިމާވެފައިވާ މި ދުވަސްވަރެއް ނަމަވެސް، ބޭރުގެ ކިޔަވާ ދަރިވަރުންނަށް ވެސް ދިމާވާ ދަތިތައް ބޭންކަށް ފާހަގަކުރެވޭ ކަމަށެވެ. އެހެންކަމުން ބޭންކުގެ އެ ނިންމުމަކީ، ބޭރުގައި ކިޔަވާ ދަރިވަރުންނާ މެދު ބޭންކުން ވިސްނައި، އިސްކަންދޭ ކަން ހާމަކޮށްދޭ ކަމެއް ކަމުގައި ވެސް ޝަރީފް ވިދާޅުވިއެވެ.

އޭގެ އިތުރަށް، އެ ބަޔާނުގައި ބޭންކުން ވަނީ، ޑޮލަރުގެ ޙާލަތަށް ރިއާޔަތްކޮށް ބަދަލެއް ގެނެވޭނެ ނަމަ، އެ ބަދަލެއް ހިއްސާކުރާނެ ކަމުގެ ޔަގީންކަން ދީފައެވެ.

ބީއެމްއެލް އިން ބޭރުގައި ކިޔަވާ ދަރިވަރުންނަށް ނެގޭ ޑޮލަރު ލިމިޓު 1200 އަށް ބޮޑުކުރި އިރު، އެކަމަކީ މިދިޔަ ޑިސެމްބަރު ކުރާނެ ކަމަށް ސަރުކާރުން ހާމަކޮށްފައިވާ ކަމެކެވެ. އެގޮތުން ވަޒީރުންގެ މަޖިލީހުގެ އެ ނިންމެވުން އޭރު އިއުލާންކުރެއްވީ، އޭރުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަދި މިހާރުގެ ސިއްޚީ ވަޒީރު އަބްދުﷲ ނާޒިމްއެވެ.