މަހަކު 60،000 ރުފިޔާއަށް ވުރެ ބޮޑު އާމްދަނީއެއް ލިބޭ މީހުން ސަރުކާރުގެ ހޮސްޕިޓަލްތައް ނޫން އެހެން ތަންތަނުން ބޭސްފަރުވާކުރާއިރު ހަރަދުގެ 15 އިންސައްތަ އަމިއްލައަށް ކޯޕޭމަންޓެއްގެ ގޮތުގައި ދައްކަންޖެހޭ ގޮތަށް ހަމަޖައްސައިފި އެވެ.

އާސަންދައިގެ ނިޒާމަށް ގެންނަ އިސްލާހުތަކުގެ ދަށުން، ހެލްތު މިނިސްޓްރީން ހޮނިހިރު ދުވަހު ކުރި އިއުލާނެއްގައި ބުނެފައި ވަނީ މި އުސޫލަށް އަމަލުކުރަން ފަށާނީ އަންނަ ޖެނުއަރީ މަހުން ފެށިގެން ކަމަށެވެ. އަމިއްލަ ހޮސްޕިޓަލްތަކާއި ކްލިނިކްތަކުން ޚިދުމަތް ހޯދާއިރު 15 އިންސައްތަ ދައްކަން ޖެހުނު ނަމަވެސް، ރާއްޖެއިން ބޭރަށް ފަރުވާއަށް ފޮނުވުމުގައި މަތީ އާމްދަނީ ލިބޭ މީހުން އިސްތިސްނާއެއް ނުވާނެއެވެ.

Ad by Hajj Corporation

މަހަކު 60،000 ރުފިޔާއަށް ވުރެ މަތިން އާމްދަނީ ލިބުނު ނަމަވެސް، ޑޮކްޓަރުންނާއި މެޑިކަލް ދާއިރާގެ ފަންނީ މުވައްޒަފުންނާއި، ޕައިލެޓުންނާއި އޭވިއޭޝަން ދާއިރާގެ ފަންނީ މުވައްޒަފުންގެ އިތުރުން އިންޖިނިއަރުންނާއި ސައިންސް ބޭސްޑް ދާއިރާތަކުގެ ފަންނީ މުވައްޒަފުން މި އުސޫލުން އިސްތިސްނާވާނެ ކަމަށް އިއުލާނުގައި ބުނެފައިވެ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައިވާ ގޮތުގައި މިހާތަނަށް އާސަންދަ ދެމުން އައީ އެންމެ މުއްސަނދި މީހާއާއި އެންމެ ފަގީރު މީހާއަށް ވެސް އެއްވެސް ތަފާތުކުރުމެއް ނެތި އެވެ. ނަމަވެސް އެއީ އެންމެ އިންސާފުވެރިގޮތް ކަމަށް ގަބޫލުނުކުރައްވާތީ، މަތީ އާމްދަނީ ލިބޭ ފަރާތްތަކަށް ކޯ-ޕޭ ނުވަތަ ޕްރީ-ޕޭ އުސޫލުން ކަންކަން ހަމަޖައްސަން ނިންމެވި ކަމަށް ވެސް ރައީސް ވަނީ ވިދާޅުވެފަ އެވެ. ސަރުކާރުން އަންދާޒާކުރާގޮތުގައި މި ބަދަލާއެކު ދައުލަތުގެ ބަޖެޓުން އަހަރަކު 287 މިލިއަން ރުފިޔާ ސަލާމަތްކުރެވި، އެ ފައިސާ ރައްޔިތުންނަށް ބޭނުންވާ އެހެން ކަންކަމަށް ހަރަދުކުރެވޭނެއެވެ.