ނޭޝަނަލް ވޮލީބޯލް ޗެންޕިއަންޝިޕް ގެ ފައިނަލް މެޗު މިރޭ 8:30 ގައި ޔޫތު ސެންޓަރުގެ އިންޑޯ ހޯލްގައި ކުޅޭނެއެވެ. މި މެޗުގައި ބައްދަލުކުރާނީ ކްލަބް ވެމްކޯ އާއި ޕޮލިސް ކްލަބެވެ. މި މަހުގެ 22 އިން 25 އަށް ޔޫތު ސެންޓަރުގެ އިންޑޯ ހޯލްގައި ކުރިޔަށް ގެންދާ މި މުބާރާތުގެ އަންހެން ޑިވިޝަންގައި 4 ޓީމެއް ވާދަކުރެއެވެ. އެއީ ޕޮލިސް ކްލަބާއި ވެމްކޯގެ އިތުރުން ވޮލީބޯލް ނިއު ޖެނެރޭޝަން އަދި ހިންމަފުށި ވިކްޓޯރިއަސް ސްޕޯޓްސް ކްލަބެވެ.

މި މުބާރާތުގެ ސެމީ ފައިނަލްގެ ފުރަތަމަ މެޗުގައި ވޮލީބޯލް ޔޫތު ނިއުޖެނެރޭޝަން ވަނީ ހިންމަފުށި ވިކްޓޯރިއަސް ސްޕޯޓްސް ކްލަބް އަތުން ތިން ސެޓު އެއް ސެޓުން ކާމިޔާބުކޮށްފައެވެ. މި މެޗު އެޓީމު ކާމިޔާބު ކޮށްފައިވަނީ 25-13، 25-17، 20-25 އަދި 27-25 އިންނެވެ.

ސެމީ ފައިނަލްގެ ދެވަނަ މެޗުގައި ވެމްކޯއިން ވަނީ ޕޮލިސް ކުލަބާއި ވާދަކޮށް ސީދާ ތިންސެޓުން މޮޅުވެ ފައިނަލަށް ދަތުރުކޮށްފައެވެ. މި މެޗު ވެމްކޯ އިން ކާމިޔާބު ކޮށްފައިވަނީ 25-17، 25-23 އަދި 25-19 އިންނެވެ.

ސެމީ ފައިނަލްގެ ތިންވަނަ މެޗުގައި ބައްދަލުކުރީ ފުރަތަމަ ސެމީ ގައި މޮޅުވި ވޮލީބޯލް ޔޫތު ނިއުޖެނެރޭޝަން އާއި ދެވަނަ ސެމީއިން ބަލިވި ޕޮލިސް ކްލަބެވެ. މި މެޗު ޕޮލިސް ކްލަބުން ކާމިޔާބު ކުރީ 25-20، 25-16 އަދި 25-20 އިންނެވެ. މި މެޗާއެކު އެޓީމުވަނީ ފައިނަލުގެ ދެވަނަ ޖާގަ ކަށަވަރުކޮށްފައެވެ.