ބޭންކް އޮފް މޯލްޑިވްސް (ބީއެމްއެލް) ގެ މައި އޮފީސް ހުޅުމާލެ ދެވަނަ ފިޔަވަހީގައި އިމާރާތްކުރުމަށްޓަކައި، އެތަން ޑިޒައިންކޮށް، އިމާރާތްކޮށް އަދި ފައިނޭންސް ކޮށްދޭނެ ފަރާތެއް ހޯދުމަށް އިޢުލާންކޮށްފިއެވެ.

ހުޅުމާލޭގެ 2,648.40 އަކަމީޓަރުގެ ބިމެއްގައި (ލޮޓް ނަންބަރު 11824) ބިނާކުރާ މިއިމާރާތަކީ ބޭސްމަންޓުގެ 2 ފްލޯއާ އެކު ޖުމްލަ 14 ބުރީގެ އިމާރާތެކެވެ. މި އިއުލާނުގައިވާ ގޮތުން އިމާރާތުގެ ގްރައުންޑް ފްލޯގައި ހާއްސަކުރަނީ ކަސްޓަމަރުންނަށް ހިދުމަތް ދިނުމަށާއި މުވައްޒަފުންގެ ބޭނުންތަކަށް އަދި ރީ-ޓެއިލް ކަންކަމަށެވެ. އަދި 12 ވަނަ ފްލޯގައި ބަގީޗާ ޓެރަސްއެއް ހެދުމަށް ވަނީ ހަމަޖެހިފައިވާއިރު، 13 އަދި 14 ވަނަ ފްލޯ ހާއްސަ ކުރެވޭނީ އެގްޒެކެޓިވް އޮފީސްތަކަށް ކަމަށް އިއުލާނުގައި ވަނީ ބުނަފައެވެ.

Ad by Hajj Corporation

އިއުލާނުގައިވާ ގޮތުން މަދުވެގެން 65 ކާރާއި 400 ސައިކަލް ޕާކުކުރެވޭނެ ޖާގަ ހުންނާނެއެވެ. އަދި އިޔާދަކުރަނިވި ހަކަތަ އުފެއްދުމަށް އިމާރާތުގެ ފުރާޅުގައި ސޯލާ ފާމެއް ޤާއިމުކުރަންޖެހެއެވެ.

މި މަޝްރޫޢު ކާމިޔާބުކުރާ ފަރާތަކުން މުޅި މަޝްރޫޢުގެ ފައިނޭންސް ހަމަޖައްސަންޖެހޭނީ ބީއެމްއެލް ނޫން ބޭރުގެ ވަސީލަތްތައް މެދުވެރިކޮށް، އެމެރިކާ ޑޮލަރުންނެވެ. ބީއެމްއެލްގެ ފައިސާ ނުވަތަ ބޭންކުން ފޮރިން ކަރަންސީ ހަމަޖައްސައިދޭ ގޮތަށް ހުށަހަޅާ ހުށަހެޅުންތައް ބަލައިނުގަންނާނެއެވެ. ނަމަވެސް ކޮންވެންޝަނަލް ނުވަތަ އިސްލާމިކް (ޝަރީޢާ) ފައިނޭންސިންގ މޮޑެލްތައް ހުށަހެޅިދާނެއެވެ.

މި މަޝްރޫޢަށް ޝައުޤުވެރިކަން ފާޅުކުރުމުގެ ސުންގަޑިއަކީ މި މަހުގެ 30 ވަނަ ދުވަހުގެ ހަވީރު 4:00 އެވެ.