މިއަހަރުގެ ފުރަތަމަ 10 މަސްދުވަހުގެ ތެރޭގައި މުދަލު ޒަކާތުގެ ގޮތުގައި 114.9 މިލިޔަން ރުފިޔާ ލިބިފައިވާ ކަމަށް މީރާގެ ތާފާސްހިސާބުތަކުން ދައްކައިފި އެވެ.

Ad by Hajj Corporation

މީރާއިން އާންމުކޮށްފައިވާ މިދިޔަ އޮކްޓޫބަރު މަހުގެ މާލީ ރިޕޯޓުގައިވާގޮތުން، މިދިޔަ އަހަރުގެ މި މުއްދަތުގައި މުދަލު ޒަކާތުގެ ގޮތުގައި ލިބިފައިވަނީ 93.4 މިލިޔަން ރުފިޔާ އެވެ. މިއީ %23 ގެ ކުރިއެރުމެކެވެ. ތަފާސްހިސާބުތަކަށް ބަލާއިރު، ހަމައެކަނި އޮކްޓޫބަރު މަހު މުދަލު ޒަކާތުގެ ގޮތުގައި ދައުލަތަށް ލިބިފައިވަނީ 5.2 މިލިޔަން ރުފިޔާއެވެ. މިއީ މިދިޔަ އަހަރުގެ އޮކްޓޫބަރު މަހު ލިބުނު 5.5 މިލިޔަން ރުފިޔާއާ އަޅާބަލާއިރު ކުޑަ ދަށްވުމެކެވެ. ނަމަވެސް، މިއަހަރުގެ ސެޕްޓެންބަރު މަހާ ހަމައަށް އައިއިރުވެސް، މިދިޔަ އަހަރު މުޅި އަހަރު ލިބުނު ޖުމްލަ އަދަދު (106.4 މިލިޔަން ރުފިޔާ) ވަނީ ފަހަނައަޅައި ގޮސްފައެވެ.

ޒަކާތާ ގުޅޭގޮތުން ޒަކާތު ހައުސްއިން ގެންގުޅޭ ސިޔާސަތުތަކުގެ ތެރެއިން، މުދަލު ޒަކާތް ލިބޭ މިންވަރު އަހަރަކު %10 އިތުރުކުރުމަށް ވަނީ އަމާޒުހިފާފައެވެ. އަދި 2028 ވަނަ އަހަރުގެ ތިންވަނަ ކުއާޓަރާ ހަމައަށްދާއިރު، ލިބޭ ޖުމްލަ ޒަކާތުގެ މަދުވެގެން %25 އަކީ ކުންފުނިތަކާއި ބޮޑެތި ވިޔަފާރިވެރިންގެ ފަރާތުން ލިބޭ ޒަކާތް ކަމުގައި ހެދުމަށް އެ އިދާރާއިން ލަފާކުރެއެވެ.

މީގެ އިތުރުން، މިދިޔަ އޮގަސްޓު މަހުގެ 20 ވަނަ ދުވަހުން ފެށިގެން މުދަލު ޒަކާތް ނެރުން ވާޖިބުވާ ނިސާބުގެ މިންވަރަކީ 19,266.10 ރުފިޔާ ކަމަށް ކަނޑައަޅާފައިވެއެވެ. މުދަލެއްގައި ނިސާބު ހަމަވެ، އަހަރެއް ފުރިފައިވާ ކޮންމެ މީހެއްގެ މައްޗަށް މުދަލު ޒަކާތް ދެއްކުމަކީ ދީނީ ވާޖިބެކެވެ. ރައްޔިތުންނަށް ލުއިފަސޭހަކޮށްދިނުމުގެ ގޮތުން މީރާގެ އޮފީސްތަކާއި ކަލެކްޝަން ސެންޓަރުތަކުގެ އިތުރުން ރަށްރަށުގެ ކައުންސިލް އިދާރާތަކުންވެސް މުދަލު ޒަކާތް ބަލައިގަންނަމުންދާ ކަމަށް މީރާއިން މައުލޫމާތިދެ އެވެ.