ޔޫއެފާ ނޭޝަންސް ލީގުގެ ގްރޫޕް އޭ1 ގައި ފަހަތުން އަރައި 3-1 އިން ފްރާންސް ބަލިކޮށް، ކުއާޓާ ފައިނަލުގެ އުންމީދު ދަމަހައްޓައިގެން އިޓަލީން ގްރޫޕުގެ އެއްވަނަ މަގާމު ހޯދައިފިއެވެ. މި ނަތީޖާއާއެކު މިއީ ފްރާންސްގެ ކޯޗުކަމާ ހަވާލުވި ފަހުން ޒައިނުއްދީން ޒިދާން ބަލިވި ފުރަތަމަ މެޗެވެ.

މެޗުގެ 10 ވަނަ މިނެޓުގައި މައިކަލް އޮލީސޭ ލަނޑު ޖަހައި ފްރާންސަށް ކުރިހޯދައިދިނެވެ. ނަމަވެސް، 26 ވަނަ މިނެޓުގައި ފްރެންޗެސްކޯ ޕިއޯ އެސްޕޮސިޓޯ ވަނީ އިޓަލީއަށް ނަތީޖާ ހަމަހަމަކޮށްދީފައެވެ. ދެވަނަ ހާފުގައި އިޓަލީގެ ސެބަސްޓިއާނޯ އެސްޕޮސިޓޯ ފޮނުވާލި ޕެނަލްޓީ ބޭރަށް ދިޔަ ނަމަވެސް، އޭގެ ތިން މިނެޓު ފަހުން ޑާވިޑޭ ފްރަޓޭސީ ވަނީ ލަނޑެއް ޖަހައި އިޓަލީއަށް ލީޑު ނަގައިދީފައެވެ. އަދި މެޗު ނިމެން 15 މިނެޓަށް ވެފައި ވަނިކޮށް، ލިބުނު ޕެނަލްޓީއަކުން ޕިއޯ އެސްޕޮސިޓޯ ވަނީ އިޓަލީގެ ތިންވަނަ ލަނޑު ކާމިޔާބުކޮށްދީފައެވެ.

Ad by Hajj Corporation

ކްރިސްޓިއަން ވިއެރީއަށް ފަހު އިޓަލީ ޤައުމީ ޓީމަށް ކުޅުނު ފުރަތަމަ 14 މެޗުން 8 ލަނޑު ހަމަކުރި ފުރަތަމަ ކުޅުންތެރިޔާގެ ޝަރަފު ޕިއޯ އެސްޕޮސިޓޯ ވަނީ މި މެޗުން ހޯދާފައެވެ. މި މޮޅާއެކު، ގްރޫޕް ސްޓޭޖުގެ ފަހު މެޗުގައި ބެލްޖިއަމާ ދެކޮޅަށް ނުކުންނައިރު، ކުއާޓާގެ ޖާގަ ކަށަވަރުކުރުމުގެ ބާރު މިހާރު އޮތީ އިޓަލީގެ އަތުގައެވެ.