ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ސަޕްލެމެންޓަރީ ބަޖެޓު މިއަދު މަޖިލީހުން ފާސްކޮށްފިއެވެ.

ސަރުކާރުގެ ފަރާތުން ބަޖެޓު މަޖިލީހަށް ހުށައަޅުއްވާފައިވަނީ މާލީ ވަޒީރު މޫސާ ޒަމިރެވެ. ދައުލަތުގެ މިއަހަރުގެ ބަޖެޓަށް 49.5 ބިލިއަން ރުފިޔާ ފާސްކޮށްފައިވާ އިރު ސަޕްލެމެންޓަރީ ބަޖެޓު އިތުރުކުރުމުން މި އަހަރުގެ ޖުމްލަ ބަޖެޓް 55 ބިލިއަން ރުފިޔާއަށް އަރާނެއެވެ.

ސަޕްލެމެންޓަރީ ބަޖެޓާއި އެކު މިއަހަރުގެ ބަޖެޓްގެ އާމްދަނީ 36.4 ބިލިއަން ރުފިޔާއަށް އަރާނެއެވެ. އަދި ރިކަރަންޓު ޙަރަދުތަކަށް ކަނޑައެޅިފައިވަނީ 36.4 ބިލިއަން ރުފިޔާއެވެ. މި އަހަރުގެ ބަޖެޓް ފައިނޭންސިން އަށް 19 ބިލިއަން ރުފިޔާ ހޭދަވާނެއެވެ.

މިއަހަރުގެ ބަޖެޓްގައި ހިމެނިފައިވާ މުހިއްމު ޚަރަދުތައް:

1. ސަރުކާރު ހިއްސާވާ ކުންފުނިތަކަށް ދިނުމަށް - 441 މިލިއަން ރުފިޔާ
2. އެންސްޕާ - 263 މިލިއަން ރުފިޔާ
3. މެޑިކަލް ކޮންޒިއުމަބަލްސް - 200 މިލިއަން ރުފިޔާ
4. މުސާރަ ދިނުމަށް - 24 މިލިއަން ރުފިޔާ
5. ސަބްސިޑީ (ތެޔޮ، ކާޑު، ކަރަންޓާއި ނަރުދަމާ އާއި ފެނުގެ ހިދުމަތް) - 1 ބިލިއަން ރުފިޔާ
6. ކޮންޓިންޖެންސީ ބަޖެޓް - 650 މިލިއަން ރުފިޔާ
7. ޕީއެސްއައިޕީއަށް - 2 ބިލިއަން ރުފިޔާ
8. ސްޓޫޑެންޑް ލޯނު - 458 މިލިއަން ރުފިޔާ

މިއަދުގެ ޖަލްސާގައި ސަޕްލިމެންޓްރީ ބަޖެޓް ފާސްކުރަން ފެންނަ ކަމަށް 75 މެންބަރުން ވަނީ ވޯޓު ދެއްވާފައެވެ. އަދި ނުފެންނަ ކަމަށް 11 މެންބަރުން ވަނީ ވޯޓުދެއްވާފައެވެ. އެ ބަޖެޓު ފާސްކޮށްފައިވަނީ ސަރުކާރުން ހުށަހެޅި ގޮތަށް، އިތުރު ބަދަލެއް ނުގެންސްއެވެ.