މާރާމާރި އަކީ ކޮބާ ހެއްޔެވެ؟. ދިވެހި ރަދީފުގައި މި ބަސް މާނަކޮށްފައިވަނީ ރުޅިވެރިކަމާއެކު ގަޔަށް އަތްލާ އަތްލުމުގެ ގޮތުގައެވެ. ކޮންމެއަކަސް މި ބަސް މިހާ އާއްމުވެގެން މިއުޅެނީ މިފަހުން އިދިކޮޅު ޕާޓީއެއްގެ ހަރުގެ ޖަލްސާއެއްގައި ގޮވާލި ގޮވާލުމަކާ ގުޅިގެންނެވެ. ޕޯޑިއަމް އަށް ވަޑައިގެންެނެވި ބޭފުޅަކު ވަރަށް ޖޯޝާއި ފޯރިއާއެކު ވާހަކަ ދައްކަވަމުން ވިދާޅުވީ "ހަމަ މަގުމައްޗަށް ނުކުމެގެން މުޒާހަރާކޮށްގެން މާރާމާރި ހިންގައިގެންވިޔަސް މި ވެރިކަން ބަދަލުކުރަންވީ"ކަމަށެވެ. އެމްޑީޕީގެ ވެރިން ތިއްބެވީ އަތް ޖަހަންށެވެ.

އެއާއެކު ފަތުއަޑު ކިޔާފައި މި ވީޑިއޯ ސޯޝަލް މީޑިއާގައި ފެތުރިއްޖެއެވެ. ރައްޔިތުންގެ ފާޑުކިޔުމާއި ނުރުހުންވެސް އަމާޒުވެއްޖެއެވެ. އެމްޑީޕީއަކީ މަގުމަތިން ކަންކަން ނިންމުމުގައި ފަރިތަ ބައެއްކަމަށް ގިނަ ރައްޔިތުން ބުނެއެވެ. މީގެ ކުރިންވެސް މިފަދައިން މަގުމައްޗަށް ނިކުންނަ ކޮންމެ ފަހަރަކު ހަމަނުޖެހުން ހިންގައި ގަޔަށް އަތްލައި ހިސާބަށްވެސް ކަންކަން ގޮސްފައި އެބަހުއްޓެވެ.

19 ވަނަ މަޖިލީހުގެ ޖަލްސާގެ ތެރެއިން ރައްޔިތުން މަޖިލީހުގެ އެމްޑީޕީ މެމްބަރުން މަޖިލީހުގެ އިދާރީ މުއައްޒަފުންނާއި ދިމާކޮށްފައިވެއެވެ. މި ހަމަނުޖެހުންތަކުގައި ބައެއް މުވައްޒަފުންނާއި މަޖިލީހުގެ ތަކެއްޗަށްވެސް ގެއްލުން ލިބުނެވެ. މަޖިލީހުގައި އެމްޑީޕީ މެމްބަރުންގެ އަމަލުތައް އެދުވަހު ބެހެއްޓެވީ ވަރަށް ނާތާޒުހީޒުބު ގޮތަކަށް ކަމަށާއި، އަދި އެ އަމަލުތަކުގައި ޖިނާއީ ކުށެއްވާނަމަ ބަލައިދިނުމަށް އޭރު ގިނަ ފަރާތްތަކަކުން ގޮވާލިއެވެ. ރައްޔިތުންގެ މަޖިލީހުގައި ރައްޔިތުންގެ ތަކެއްޗަށް ގެއްލުން ދިނުމުންވެސް އެކަމުގެ އަގު ލިބިފައެއްނުވެއެވެ.

8 ފެބްރުއަރީ 2012ގައި ހިންގި ހަމަނުޖެހުންތަކުގައި އިއާދަނުކުރެވޭ ޝަރުޢީ ތަރިކަ ނެތިގޮސްފައިވާ ކަމަށް އޭރު ތުހުމަތުވެސް ކުރެވުނެވެ. ރައްޔިތުންގެ މުދަލަށް ގެއްލުންދިނުމަކީ ސިޔާސީ ފިކުރުގެ ބަޔަކަށް ވެގެންނުވާނެކަމަށް އޭރު ގިނަ ފަރާތްތަކުންވެސް ގޮވާލިއެވެ.

މިކަން ހިނގި ގޮތަކީ އޭރުގެ އެމްޑީޕީގެ ރައީސް މުހައްމަދު ނަޝީދާއި އެމްޑީޕީގެ އިސް ވެރިން އިސްވެތިބެ، 8 ފެބްރުއަރީގައި އެމްޑީޕީގެ ސަޕޯޓަރުންނާއިގެން މުޒާހަރާއަށް ނުކުތެވެ. ރައީސް ނަޝީދާއި އެމަނިކުފާނުގެ ސަޕޯޓަރުން ފުލުސް އޮފީސް ސަރަހައްދަށް ޖަމާވީ އިރު ސަރަހައްދުގައި މަދުން ނަމަވެސް ތައްޔާރީ ހާލަތުގައި ދިވެހި ފުލުހުން ތިއްބެވެ. އެކަމަކު، އެއްވުން ހޫނުވެ، ހަމަނުޖެހުން ބޮޑުވުމުން، އިތުރު ފުލުހުންނާއެކު މަގު މައްޗަށް ސިފައިން ވެސް ނެރުނެވެ. މި ހަމަނުޖެހުން ކޮންޓުރޯލު ކުރާން ސިފައިންނާއި ފުލުހުން ކުރި މަސައްކަތުގައި އެތައް ބަޔަކަށް އަނިޔާ ކުރި ކަމަށް ވެއެވެ.އެ ދުވަހު ވަކި ހިސާބަކުން، ރާއްޖޭގެ ހުރިހައި ރަށެއްގައި މުޒާހަރާ އިއުލާންކޮށް އިހުތިޖާޖުތައް ފެށިއެވެ. މި އިހުތިޖާޖުތައް ހަމަނުޖެހުން ތަކަށް ބަދަލުވެ ރާއްޖޭގެ ވަރަށް ގިނަ ރަށްރަށުގެ ސަރުކާރުގެ އިމާރާތްތަކާ މުދަލުގައި ހުޅުޖެހިއެވެ. މީގެ ސަބަބުން ރައްޔިތުންނާ ގުޅުންހުރި މުހިންމު ލިއެކިއުންތައް ވެސް ނެތިގެން ދިޔައެވެ.މީހުންނަށްވެސް އަނިޔާވީއެވެ.

އަނެއްކާވެސް މާޒީ ތަކުރާރުކުރާ ބިދައިން ސިޔާސީ ޕޯޑިއަމްއެއްގައި ޖަޒުބާތުގައި ޖެހިގެން ދެއްކި ވާހަކައަކުން މިވަނީ ރައްޔިތުންނަށް ބިރު ހީވެފައެވެ. ރައްޔިތުންގެ ވޯޓަކުން ހޮވި ސަރުކާރެއް ވައްޓާލަން ގޮވާލީ މާރާމާރި ހިންގައިގެންނެވެ. ބައެއް ފަރާތްތަކުން އަންނަނީ މައްސަލަ ފުލުހުން ބެލުމަށް ވެސް ގޮވާލަމުންނެވެ. ޖަޒުބާތުގައި ޖެހިގެންވިޔަސް ޓެރަރިޒަމާއި އަނިޔާވެރިކަމަށް ޖާގަދީގެން ނުވާނެކަމަށް ހިޔާލު ފާޅުކުރާ މީހުން ބުނެއެވެ.