އާދިއްތަދުވަހުން ފެށިގެން 2 މަސްދުވަހުގެ މުއްދަތަށް ޑޮމެއިން ބޭނުންކުރުމުގެ ހުއްދައަށް އެދި ހުށަހެޅުމުގެ ފުރުސަތު ލިބިގެންދާނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނެފިއެވެ.

ޑޮމެއިން ޚިދުމަތުގެ ސެކިއުރިޓީ ހަރުދަނާ ކުރުމުގެ ގޮތުން އައު ސެކިއުރިޓީ ފީޗަރތަކާއެކު ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ ތައާރަފްކުރުމަށް ވަނީ ނިންމާފައެވެ.

ވުޒާރާއިން ބުނީ މި އައު ނިޒާމުގެ ދަށުން، އާދިއްތަ ދުވަހުން ފެށިގެން 60 ދުވަހުގެ ތެރޭގައި ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކި ކަމުގެ ރަސީދު މިނިސްޓްރީއަށް ހުށަހަޅައިގެން އަލަށް ތައާރަފްކުރާ ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދައަށް ބަދަލުކުރެވޭނެކަމަށެވެ. އަދި އަލަށް ތައާރަފްކުރާ ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ ހޯދުމަށް މިނިސްޓްރީއަށް ހުށަހަޅާ ލިޔުންތައް ބަލައިގަތްކަމުގެ ލިޔުމެއް ދޫކުރެވޭނެކަމަށްވެސް ވުޒާރާއިން ބުނެއެވެ.

ޑޮމެއިންގެ ޚިދުމަތައް އެދި ލިޔެކިޔުންތައް ހުށަހެޅުމަށް ދެ ގޮތެއް ވަނީ ހަމަޖެހިފައެވެ. އެއީ ޑޮމެއިންގެ ޚިދުމަތައް ޙާއްސަކޮށްފައިވާ އީމެއިލްއަށް މެއިލްކުރުން ނުވަތަ ޑޮމެއިންގެ މަސައްކަތަށް މިނިސްޓްރީއިން ޚާއްސަކޮށްފައިވާ ކައުންޓަރަށް ހުށަހެޅުމެވެ. ކައުންޓަރު ހުޅުވިފައި ހުންނާނީ ރަސްމީ ދުވަސްތަކުގައި ހެނދުނު 9:00 އިން 13:00 އަށް މިނިސްޓްރީގެ ގްރައުންޑް ފްލޯގައެވެ.

60 ދުވަހުގެ މުއްދަތު ހަމަވުމަށްފަހު ވުޒާރާއިން ޑޮމެއިންގެ ގޮތުގައި ބަލައިގަންނާނީ އެއްގަމު އުޅަނދުގައި ޑޮމެއިން ބޭނުންކުރުމުގެ ގަވާއިދު ގައި ބަޔާންކޮށްފައިވާ ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ އެކަނިކަމަށް ވުޒާރާއިން މައުލޫމާތުދެއެވެ.

ނިމިދިޔަ ސަރުކާރުގެ ދައުރުގެ ފަހުކޮޅު، ޑޮމެއިންގެ ގިނަ މައްސަލަތަކެއް ފެންމަތިވުމާ ގުޅިގެން ވަނީ ޑޮމެއިންގެ އެންމެހާ ޚިދުމަތްތައް ހުއްޓާލާފައެވެ. މި ޚިދުމަތަކީ ޚާއްސަކޮށް ޒުވާނުންގެ މެދުގައި ވަރަށް މަގުބޫލު އަދި ބޮޑެތި ހޭދަތައް ވެސް ކޮށްފައިވާ ޚިދުމަތެކެވެ.