logoEN
ޚަބަރު

ފ. އަތޮޅުގެ ދެ ރަށެއްގައި ލައިސަންސް ޓްރެކް ހުޅުވަނީ

އާމިނަތު ސަފާއާމިނަތު ސަފާ

09 މާރިޗު 2025 - 07:15

ފ. އަތޮޅުގެ މަގޫދޫ އަދި ދަރަނބޫދޫގައި އައު ލައިސަންސް ޓްރެކެއް ހުޅުވުމަށް ތައްޔާރުވެއްޖެއެވެ.

މި ހުޅުވޭ ޓްރެކް އާއިއެކު، އެ ދެ ރަށުގެ ރައްޔިތުންނަށް 'އޭ' ކެޓަގަރީގެ ޑްރައިވިންގ ލައިސަންސް (ލައިސަންސް ކާޑު) ހޯދުމުގެ ފުރުސަތު ލިބިގެންދާނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މައުލޫމާތުދެއެވެ.

މި ޓްރެކް ހުޅުވުމުގެ ކުރިން ވުޒާރާގެ ޓީމެއް ވަނީ ޓްރެއިނިންގ ޕްރޮގްރާމެއް ހިންގުމަށް އެރަށް ޒިޔާރައްކޮށްފައެވެ. މި ޕްރޮގްރާމްގެ މަޤްޞަދަކީ ލައިސަންސް ޓްރެކް ހިންގުމަށް ބޭނުންވާ ތަމްރީނުތައް ކައުންސިލަށް ދިނުމެވެ.

މި އައު ޓްރެކް ހުޅުވުމާއެކު، އެ ސަރަޙައްދުގެ ރައްޔިތުންނަށް ލައިސަންސް ހޯދުމަށްޓަކައި ކައިރި އެހެން ރަށްރަށް އަދި މާލެ އައުމުގެ ބުރަ ލުއިވެގެންދާނެއެވެ. އަދި މިއީ ސަރުކާރުން ލާމަރުކަޒީ އުސޫލުން ޚިދުމަތްތައް ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން މަސައްކަތެކެވެ.

މީގެ އިތުރުން، ފާއިތުވި ޑިސެމްބަރު މަހުގެ ތެރޭގައި މ. ކޮޅުފުށީގައި ވެސް ވަނީ ޑްރައިވިންގ ލައިސަންސް ޓްރެކެއް ހުޅުވާފައެވެ. މިއީ ރާއްޖޭގެ އެކި ކަންކޮޅުތަކުގައި މިފަދަ ޓްރެކްތައް ޤާއިމުކުރުމުގެ މަޝްރޫޢުގެ ދަށުން ކުރެވޭ މަސައްކަތްތަކުގެ ތެރެއިން އެއް މަސައްކަތެވެ. މިކަމުގެ ސަބަބުން ރާއްޖޭގެ ހުރިހާ ރައްޔިތުންނަށް ވެސް ފަސޭހަކަމާއެކު ޑްރައިވިންގ ލައިސަންސް ހޯދުމުގެ ފުރުސަތު ލިބިގެންދާނެއެވެ.

މީގެ އިތުރުން ޑްރައިވިން ލައިސަންސް ތިއަރީ އިމްތިޙާނު މިހާރު ކުރިއަށް ގެންދަނީ ވުޒާރާގެ ބެލުމުގެ ދަށުންނެވެ.

މިހާތަނަށް މި އިމްތިޙާނު ކުރިއަށް ގެންދިޔައީ މޯލްޑިވްސް ޕޮލިޓެކްނިކުންނެވެ. މި ބަދަލާއެކު، އިމްތިޙާނު ހެދުމުގެ އިންތިޒާމުތައް އަދި ކަމާގުޅޭ އެހެނިހެން ކަންކަން ބަލަހައްޓާނީ ސީދާ ވުޒާރާއިންނެވެ.

އެއްގަމު އުޅަނދުގެ ލައިސަންސް ނަގާއިރު މި އިމްތިހާންގެ އިތުރުން ޑްރައިވިން ޓެސްޓެއް ވެސް ހަދަން ޖެހެއެވެ.

ކޮމެންޓް

871x217_placeholder