ނޫސްވެރިންގެ މިނިވަން ކަމަށް ހުރަސް އެޅޭ ގޮތަށް ރައްޔިތުންގެ މަޖިލީހަށް ހުށަހަޅާފައި އޮތް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު އަނބުރާ ގެންދިއުމަށް އިދިކޮޅު ދަ ޑިމޮކްރެޓްސް އިން މިއަދު ގޮވާލައިފި އެވެ.

ދަ ޑިމޮކްރެޓސް އިން މިހެން ގޮވާލާފައިވަނީ މީޑިއާތައް ޖޫރިމަނާ ކުރެވޭގޮތަށް ގާނޫނަށް އިސްލާހު ހުށަހަޅުއްވާފައިވާތީ އެވެ. މި ބިލު ރައްޔިތުންގެ މަޖިލީހަށް ހުށަހެޅުއްވީ އަމިއްލަ މެމްބަރެއްކަމުގައިވާ ތުޅާދޫ ދާއިރާގެ މެންބަރު ޢަބްދުލްޙަންނާން ޢަބޫބަކުރެވެ.

ޑިމޮކްރެޓސް އިން ބުނީ ޑިމޮކްރެޓިކް ނިޒާމެއްގެ ތެރެއިން، އަދި ރާއްޖޭގެ ގާނޫނުއަސާސީން ވެސް ބަލައިގަނެފައިވާ އެންމެހާ ހަމަތަކާއި އުސޫލުތަކަށް ބެލުމެއްނެތި، ނޫސްތަކުގެ މައްޗަށް ކަންކަން މަޖުބޫރުކުރުމާއި، ނޫސްވެރިންނަށް އަދަބު ދިނުމާއި، ނޫސްތައް ބަންދުކުރުމުގެ ބާރު އަތަށް ނެގޭގޮތަށް އެކުލަވާލައި ރައްޔިތުންގެ މަޖިލީހަށް ބިލު ހުށަހަޅާފައިވާތީ އެޕާޓީން ކަންބޮޑުވުންފާޅުކުރާ ކަަމަށެވެ.

ތެދު ބަހަކީ ސަރުކާރަށް ނުވަތަ އެނޫން ވެސް ވަކިފަރާތަކަށް އޮންނަ މޮނޮޕޮލީ އަކަށްނުވާއިރު، ސަރުކާރުން ހިތް ނުރުހޭ ގޮތަކަށް މައުލޫމާތު ޝާއިއުކުރެވިދާނޭކަމުގެ ބިރަށް، އެ މައުލޫމާތެއް ޝާއިއުކުރުމުގެ ކުރިއަށް ނަފުސު ސެންސަރުވެގެން އެ މައުލޫމާތެއް ވަކިގޮތަކަށް ބައްޓަންކުރުމަށް މަޖުބޫރުކުރުވާގޮތަށް އެ ބިލު ފަރުމާކޮށްފައި އޮތުމަކީ ނޫސްވެރިކަމުގެ މިނިވަންކަން ނަގައިލުމުގެ އމަލެއްކަމަށް އެޕާޓީން ދެކޭ ކަމަށްވެސް ބުނެފައި ވެއެވެ.

"އެހެންކަމުން، ނޫސްވެރިކަމުގެ މިނިވަންކަން ނަގައިލުމުގެ މިފަދަ ބިލެއް ރައްޔިތުންގެ މަޖިލީހުން ފާސްނުކުރުމަށް ދަ ޑިމޮކްރެޓްސް އިން ގޮވާލާ ކަމަށްވެސް އެޕާޓީން ނެރުނު ބަޔާނުގައި ބުނެފައިވެއެވެ.

ރައްޔިތުންގެ މަޖިލީހަށް ހުށަހަޅަފައިވާ ބިލުގައި ވަނީ މީޑިއާތަކާއި ވަކިވަކި ނޫސްވެރިން ޖޫރިމަނާކޮށް ލައިސަންސް ބާތިލް ކުރުމުގެ ބާރު ވެސް ލިބޭ ގޮތަށެވެ.

މިބިލު ހުށަހެޅުއްވި ސަބަބެއްކަމަށް މެމްބަރު ވިދާޅުވީ ނޫސްވެރިކަމުގެ މިނިވަންކަން ދަމަހައްޓާ ނޫސްވެރިންނަށް ގާނޫނު އަސާސީން ލިބިދޭ ހައްގުތައް ކަށަވަރުކޮށްދެއްވުން ކަމަށެވެ. އަދި ނޫސްވެރިންނަށް ގާނޫނު އަސާސީން ލިބިދީފައިވާ ހައްގުތައް ޒިންމާދާރުކަމާއެކު ބޭނުން ކުރަމުންދޭތޯ ކަށަވަރު ކުރުމާއި ނޫސްވެރިކަމުގެ މިންގަނޑުތައް ހިފަހައްޓަމުންދޭތޯ ބެލުން ކަމަށް މެމްބަރު ވިދާޅުވިއެވެ.

ބިލުގައިވާ ގޮތުން، މޯލްޑިވްސް މީޑިއާ ކައުންސިލާއި ބްރޮޑްކާސްޓިން ކޮމިޝަން އުވާލުމަށް ވަނީ ނިންމާފައެވެ