ސަރުކާރު ޒިންމާދާރު ކުރުމަށް އެހެން ސިޔާސީ ޕާޓީތަކާއި އެކު މަސައްކަތް ކުރުމަށް ދަ ޑިމޮކްރެޓްސްއިން ނިންމައިފި އެވެ.

ޑިމޮކްރެޓްސްގެ ނެޝަނަލް އެސެމްބްލީއަށް މިކަން ހުށަހެޅުއްވީ އެ ޕާޓީގެ ނައިބުރައީސް މުހައްމަދު ޝިފާޒް އެވެ. ޝިފާޒް ހުށަހެޅުއްވި ގަރާރުގައި ވިދާޅުވީ މިހާރު މިއޮތް ސަރުކާރު ހަމަމަގަށް އަޅުވައި ޒިންމާދާރުކުރުވުގެ މަސައްކަތް އިތުރުކޮށް ފުޅާކުރުމުގެ ގޮތުން، މި މަސައްކަތް ކުރުމަށް އެއްބަސްވާ ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު އެއްބަސްވެވޭ ހަމަތަކެއްގެ މަތިން މަސައްކަތްކުރުމަށެވެ.

އެ ގަރާރުގައި ބުނެފައި ވަނީ އިދިކޮޅުގައި އޮތް ސިޔާސީ ޕާޓީ އަކަށް ވުމާއި އެކު ސަރުކާރު ޖަވާބު ދާރީ ކުރުވަން މަސައްކަތް ކުރާނެ ކަމަށެވެ. ސަރުކާރުން ގަސްތުގަ އާއި އިހުމާލުން ރައްޔިތުންނާއި ދިވެހިރާއްޖެއަށް ބޭއިންސާފުވެ، ގެއްލުން ބޮޑު އެތައް ކަމެއް ތަކުރާރު ކުރަމުންދާ ކަމަށް އެ ގަރާރުގައި ބުނެފައިވެ އެވެ.

ސަރުކާރުންވެފައިވާ ވައުދުތައް ނުފުއްދުމާއި ވައުދުތަކާ ހިލާފުވަމުން ދާކަމަށްވެސް އެ ގަރާރުގައިބުނެފައިވެ އެވެ.

އެހެން ސިޔާސީ ޕާޓިތަކާއި އެކު ގުޅިގެން މަސައްކަތް ކުރުމަށް ނިންމީ ގާނޫނުއަސާސީން ތަރުތީބުކޮށްފައިވާ ޑިމޮކްރެޓިކް ނިޒާމު ބަލިކަށިކޮށް، ދައުލަތުގެ މުއައްސަސާތައް ރައީސުލްޖުމްހޫރިއްޔާއަށް ކޮންޓްރޯލް ލިބޭނެ ގޮތަށް ބަދަލުކޮށް، ރައްޔިތުންގެ ބާރުވެރިކަން ގެއްލޭ ގޮތަށް ގާނޫނުއަސާސީއަށް ކުއްލި ބޮޑެތި ބަދަލުތައް ގެނެސް، ސަރުކާރު ޖަވާބުދާރީ ކުރުވުމުގެ ދޮރުތައް ބަންދުކުރާތީ ކަމާށްވެސް ޝިފާޒުގެ ގަރާރުގައި ފާހަގަކޮށްފައިވެ އެވެ.

މީގެ އިތުރުން އިދިކޮޅު އެމްޑީޕީން ވެސް ވަނީ އެއްބަސް ވެވޭ ވަކި އުސޫލެއްގެ ދަށުން އެހެން ސިޔާސީ ޕާޓީތަކާ އެކު ސަރުކާރު ޖަވާބުދާރީ ކުރުވުމަށް މަސައްކަތް ކުރަން ނިންމާފަ އެވެ.