ސަރުކާރު ޖަވާބުދާރީ ކުރެވެން ހުރި ގޮތްތަކުން ޖަވާބުދާރީ ކުރުވައި އެކަން ކަން ކުރާނެ އޮނިގަނޑެއް ގާއިމްކުރުމާއި ގުޅޭ ގޮތުން "ސްޓެރެޖެޓިކް ވޯކް ޝޮޕް އޮން ގަވާންމެންޓް ވޮޗު އެންޑް އެކައުންޓެބިލިޓީ" ގެ ނަމުގައި ވޯކް ޝޮޕެއް އިދިކޮޅު ޕާޓީ އެއް ކަމަށްވާ ދަ ޑިމޮކްރެޓްސް އިން ބާއްވައިފިއެވެ.

މިރޭ މާގިރި ހޮޓަލުގައި ބޭއްވި މި ބައްދަލުވުން އިފްތިތާޙް ކޮށްދެއްވީ ޑިމޮކްރެޓްސް އިން އިންތިޚާބުކޮށްފައިވާ ކޮމެޓީ ތަކުގެ ރައީސް ހުސެއިން އަމްރު އެވެ. މި ވޯކް ޝޮޕްގައި ޑިމޮކްރެޓްސް ގެ ހިންގުން އިތުރަށް ހަރުދަނާކޮށް ސަރުކާރު ޖަވާބުދާރީ ކުރެވެން ހުރި ގޮތްތަކާއި މެދު ޕާޓީގެ ޚާއްސަ އިސް މެންބަރުންނާއި އާއްމު މެންބަރުންނާއި ދެމެދު ވަނީ މަޝްވަރާ ތައް ކުރިއަށް ގެންގޮސްފައެވެ.

Ad by Hajj Corporation

ޑިމޮކްރެޓްސްގެ ޗެއާ ޕާސަން ހަސަން ލަތީފް ވިދާޅުވީ ސަރުކާރު ޖަވާބުދާރީ އެންމެ ފުރިހަމައަށް ކުރެވޭނީ ސްޓްރެޓީޖިކް ކޮށް ސަރުކާރުން ކުރާ މަސައްކަތްތައް ދިރާސާކޮށްގެން ކަމަށެވެ. އެހެން ކަމުން ޑިމޮކްރެޓްސްގެ އޮނިގަނޑު އެކުލަވާލާފައިވަނީ އެ މަސައްކަތްތައް ކުރެވޭނެ ގޮތަށް ކަމަށް ވެސް ހަސަން ލަތީފް ވަނީ ހާމަކުރައްވާފައެވެ.

މިރޭ ބޭއްވި މަސައްކަތު ބައްދަލުވުމުގެ ތެރެއިން ޗާގޯސް އާއި ބެހޭ ގޮތުން މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ( ބޮންޑޭ) ލިޔުނު ފޮތެއްވެސް ނެރުން އޮތެވެ.