ރާއްޖެއަށް އިންވެސްޓްކުރާ ފަރާތްތަކުގެ ތެރެއިން ބޮޑެތި އިންވެސްޓަރުންނަށް، ރާއްޖެއިން ބޯހިޔާވަހިކަން ލިބޭ ޕްރޮގްރާމެއް ހިންގުމަށް ވަޒީރުންގެ މަޖިލީހުގައި މަޝްވަރާކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް އެފަދައިން ވިދާޅުވީ، މިއަދުގެ ވަޒީރުންގެ މަޖިލީހަށް ވަޑައިގެންނުވުމުގެ ކުރިން ވަޒީރުންގެ ޖަލްސާގައި މަޝްވަރާކުރެއްވުމަށް ހަމަޖެހިފައިވާ ކަންކަމާ ގުޅޭ ގޮތުން ދެއްވި ކުރު ވީޑިޔޯ މެސެޖެއްގައެވެ.

އެ މެސެޖުގައި ރައީސް ވިދާޅުވީ، ދުނިޔޭގެ ބައެއް ބޮޑެތި ތަރައްގީވެފައިވާ ގައުމުތަކުގައި ވެސް ޢަމަލުކުރާ ގޮތަށް ރާއްޖޭގެ އިގްތިސާދު ސިންދަފާތުކުރުމުގެ ގޮތުން، ރާއްޖެއަށް އިންވެސްޓްކުރާ އިންވެސްޓަރުންނަށް ރެޒިޑެންސީ ޕްރޮގްރާމެއް ކުރިއަށް ގެންދިޔުމަށް ވަޒީރުންގެ މަޖިލީހުގައި މަޝްވަރާކުރައްވާނެ ކަމަށެވެ.

ރައީސް ވިދާޅުވީ އެކަމަކީ ރާއްޖެއަށް މުޅިން ތަފާތުކަމަކަށްވީ ނަމަވެސް، އެކަމަކީ ރާއްޖޭގެ ތަރައްގީއަށް ވަރަށް މުހިންމު ކަމަކަށް ވާނެ ކަމަށެވެ.

"ވަރަށް ތަފާތު، އެހެންނަމަވެސް ރާއްޖޭގެ ތަރައްގީއަށް ވަރަށް މުހިންމު ކަމެއް. އަދި، ކުރިއަރާފައިވާ ބައެއް ގައުމުތަކުގައި ކަންކުރާ ގޮތް،" ރައީސް ވިދާޅުވިއެވެ.

އިންވެސްޓަރުންނަށް ބޯހިޔާވަހިކަން ފޯރުކޮށްދިނުމަކީ ދުނިޔޭގެ ބައެއް ބޮޑެތި އަދި ކުދި ގައުމުތަކުގައި ވެސް ކުރާ ކަމެކެވެ. އޭގެ ތެރޭގައި ތުރުކީ، ގްރީސް، އެކުވެރި އަރަބި އިމާރަތް، ސްޕެއިން އަދި ހޮންގް ކޮންގް ފަދަ ގައުމުތަށް ހިމެނެއެވެ.