ދުންފަތުގެ ބާވަތްތައް ރާއްޖެ އެތެރެ ކުރުމަށް ހެލްތު މިނިސްޓްރީން ދޫކުރާ ލައިސަންސެއް ލާޒިމްވާނީ ޤާނޫނުގައި ބަޔާންކުރާ ފަދައިން މި ހުއްދަތައް ދިނުމުގެ އުޞޫލާއި އިޖުރާއަތުތައް ކަނޑައަޅާ ބަޔާންކުރާ ގަވާއިދު ޢާންމުކުރުމުން އެ ގަވާއިދުގައި ކަނޑައަޅާ މުއްދަތެއްގައި ކަމަށް ހެލްތު މިނިސްޓްރީން ބުނެފިއެވެ.

ހެލްތް މިނިސްޓްރީން ކުރި އިއުލާނެއްގައި ބުނީ ދުންފަތް ކޮންޓްރޯލުކުރުމާބެހޭ ޤާނޫނަށް އަށް 15 ނޮވެންބަރުން ފެށިގެން ޢަމަލުކުރަން ފެށުމާއެކު ދުންފަތުގެ ބާވަތްތައް ދިވެހިރާއްޖެއަށް އެތެރެކުރާ އަދި ދިވެހިރާއްޖެއިން ބޭރުކުރާ ކޮންމެ ފަރާތަކާއި، ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ދިވެހިރާއްޖޭގައި ވިއްކާ ކޮންމެ ފަރާތެއްގެ ކިބައިގައި، ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މި ޤާނޫނުގެ ދަށުން މިނިސްޓްރީން ދޫކުރާ ޞައްޙަ ލައިސަންސެއް އޮންނަންވާނެކަމަށް ބަޔާންކޮށްފައިވާ ކަމަށެވެ.

އަދި މި ޤާނޫނާއި މި ޤާނޫނުގެ ދަށުން ހަދާ ގަވާއިދުތަކާ ޚިލާފަށް އެއްވެސް ފަރާތަކުން ދުންފަތް ނުވަތަ ދުންފަތުގެ އެއްވެސް ބާވަތެއް ދިވެހިރާއްޖެއަށް އެތެރެކޮށް، ނުވަތަ ދިވެހިރާއްޖެއިން ބޭރުކޮށް، ނުވަތަ ދިވެހިރާއްޖޭގައި ބަހައި، ނުވަތަ ވިއްކައި ހަދައިގެން ނުވާނެކަމަށް ޤާނޫނުގައި ބަޔާންކޮށްފައިވާކަމަށްވެސް އިއުލާނުގައިވެއެވެ.

ނަމަވެސް އެހުއްދަތައް ހޯދުމަށް ލާޒިމްވާނީ ޤާނޫނުގައި ބަޔާންކުރާ ފަދައިން މި ހުއްދަތައް ދިނުމުގެ އުޞޫލާއި އިޖުރާއަތުތައް ކަނޑައަޅާ ބަޔާންކުރާ ގަވާއިދު ޢާންމުކުރުމުން އެ ގަވާއިދުގައި ކަނޑައަޅާ މުއްދަތެއްގައި ކަމަށް ހެލްތު މިނިސްޓްރީން މައުލޫމާތުދެއެވެ.

ދުންފަތުގެ އިސްތިއުމާލުކުރާ މީހުން މަދުކޮށް މިއާދައަށް ރައްޔިތުން ދެވި ހިފުން ހުއްޓުވުމަށް ގިނަ މަސައްކަތްތަކެއް ސަރުކާރުން އަންނަނީ ކުރަމުންނެވެ.