މިހާރު ރާއްޖެއަށް ކުރަމުންދާ ވިއްސާރައާއި ގުޅިގެން ނ.މާފަރަށް ބޮޑެތި ގެއްލުންތަކެއް ލިބިއްޖެއެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މައުލޫމަތު ދޭ ގޮތުގައި މާފަރުގައި ފެންބޮޑުވެ، 5 ގެއަކަށް ފެންވަދެގެން ރިޕޯޓްކޮށްފައިވެއެވެ. މީގެ ތެރެއިން ގެއްލުންލިބުނު 1 ގެއެއްގެ މީހުން އެހެން ގެއަކަށް ބަދަލުކޮށްފައިވާކަމަށް މާފަރު ކައުންސިލުން މަޢުލޫމާތު ދެއްވާފައިވެއެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ގަދަވަޔާއެކު ވިއްސާރަކުރާ ދުވަސްވަރު ދިމާވެދާނެ ހާދިސާއަކަށް ރައްކާތެރިވުމަށް ދުރާލާ ފިޔަވަޅުއެޅުމަށް އެދިފައެވެ. އަދި ދަތުރަށް ނުކުންނައިރު ސަލާމަތީ ކަންކަމާއި މުވާސަލާތީ ނިޒާމް ފުރިހަމައަށް ޔަގީން ކުރުމަށްވެސް އެންޑީއެމްއޭއިން ވަނީ އިރުޝާދު ދެއްވާފައެވެ.

އެންޑީއެމްއޭއިން ބުނީ، ރާއްޖެއަށް މިހާރު ކުރަމުންދާ ވިއްސާރައިގައި ދެކުނާއި މެދުރާއްޖެތެރޭގެ ބައެއް ރަށްރަށުގެ ގެތަކަށް ގެއްލުން ލިބިގެން ރިޕޯޓްކޮށްފައިވާކަމަށެވެ. ވިއްސާރައިގައި ގެއްލުންލިބިގެން ރިޕޯޓްކޮށްފައިވާ ރަށްތަކުގެ ތެރޭގައި ދ.ބަނޑިދޫ، ޅ.ކުރެންދޫ، ސ.ފޭދޫ ހިމެނެއެވެ. މިރަށްތަކަށް ސަރުކާރުގެ އިދާރާތަކުން ވަނީ އެހީތެރިކަން ފޯރުކޮށްދީފައެވެ.