މިހިނގާ 2024 ވަނަ އަހަރުގެ މިހާތަނަށް ޒަކާތު ފަންޑުން ބޯން މެރޯ ޓްރާންސްޕްލާންޓް ހެދުމަށް 8 މިލިޔަނަށް ވުރެ ގިނަ ރުފިޔާ ޚަރަދުކޮށްފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން ބުނެފިއެވެ.

އެންސްޕާއިން މިއަދު އާންމުކުރި މައުލޫމާތަށް ބަލާއިރު އަހަރުގެ މިހާތަނަށް ބޯންމެރޯ ހެދުމަށް ޒަކާތު ފަންޑުންވަނީ 8،033،646.37 ރުފިޔާ ވަނީ ހޭދަކޮށްފައެވެ.އެންސްޕާއިން އާންމުކުރި މައުލޫމާތުން ދައްކާގޮތުގައި ތެލެސީމިއާ ބަލި ތަޙައްމަލް ކުރަމުންދާ 14 ކުށްޖަކުވަނީ ޒަކާތު ފަންޑުގެ ޚަރަދުގައި މިއަހަރު ބޯންމެރޯ ޓްރާންސްޕްލާންޓް ހެދުމަށް ފޮނުވާފައެވެ.

އޭގެ ތެރެއިން 8 ކުއްޖެއްގެ ބޯންމެރޯ ޓްރާންސްޕްލާންޓް ހަދާފައިވާއިރު، މިވަގުތުވެސް 5 ކުއްޖަކު ބޯންމެރޯ ހަދަމުންދާ ކަމަށް އެންސްޕާއިން ހާމަކޮށްފައިވެއެވެ.

މިހިނގާ 2024 ވަނަ އަހަރުގެ މިހާތަނަށް ޒަކާތު ފަންޑުން ބޯން މެރޯ ޓްރާންސްޕްލާންޓް ހެދުމަށް 8 މިލިޔަނަށް ވުރެ ގިނަ ރުފިޔާ ޚަރަދުކޮށްފައިވާއިރު، ތެލެސީމިއާ ކުދިންނަށް އަޅާލުމާއި ފަރުވާ ހޯދައިދިނުމަށް ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި މުހިންމު ކަންތައްތަކެއް ހިމަނައި އަންނަނީ ތަންފީޒު ކުރަމުންނެވެ. މީގެ ތެރޭގައި ތެލަސީމާ އަށް ޚާއްޞަ ފުރަތަމަ ހޮސްޕިޓަލް ރާއްޖޭގައި އެޅުމަށް އަންނަނީ މަސައްކަތް ކުރަމުންނެވެ.