މިދިޔަ ހޮނިހިރު ދުވަހު ބޭއްވި ޕީޕަލްސް ނޭޝަނަލް ކޮންގްރެސް، ޕީއެންސީ އެތެރޭގެ އިންތިޚާބުގެ ވަގުތީ ނަތީޖާ އިއުލާންކޮށް، ޝަކުވާ ހުށަހެޅުމުގެ ފުރުސަތު އެޕާޓީން ހުޅުވާލައިފި އެވެ.
ޕީއެންސީން މުޅި ރާއްޖޭގައި މިދިޔަ ހޮނިހިރު ދުވަހު ބޭއްވި އެޕާޓީގެ އިންތިހާބަކީ މިހާތަނަށް ޕާޓީ އަކުން ބޭއްވި އެންމެ ބޮޑު ސިޔާސީ ޕާޓީއެއްގެ އެތެރޭގެ އިންތިހާބެވެ.
ޕީއެންސީން ބުނީ ވަގުތީ ނަތީޖާ އިއުލާނުކުރީ ވޯޓުލާ މަރުކަޒުތަކުގައި ވޯޓު ގުނައި އެ މަރުކަޒުތަކުގައި އިއުލާންކުރި ނަތީޖާތައް ކަށަވަރު ކުރުމަށްފަހު ކަމަށެވެ. ނަމަވެސް އެ ނަތީޖާއާމެދު ޝަކުވާއެއް އޮތްނަމަ ހެކިތަކާއެކު އެކަމަށް ހާއްސަ ފޯމާއެކު ޝަކުވާ ހުށަހެޅޭނެ ކަމަށްވެސް އެޕާޓީން ބުންޏެވެ.

މި އިންތިޚާބުގެ ދާއިމީ ނަތީޖާ އިއުލާނުކުރާނީ އިންތިޚާބުގައި ބެހެއްޓި ވޯޓުފޮށިތަކުގެ ވޯޓު ކަރުދާސްތަކާއި ނަތީޖާ ޝީޓުތަކުުގެ އަސްލު ޕާޓީ އޮފީހަށް ލިބުމުން މެމްބަރުން ހުށަހަޅާ ޝަކުވާތަކަށް ބެލުމަށްފަހު ކަމަށް ޕީއެންސީން ބުނެ އެވެ. އަދި ވޯޓު ލައިގެން އިންތިހާބުވި މަގާމުތަކާއި ވޯޓަކާއި ނުލައި އިންތިހާބުވި މަގާމުތައް އަދި ޕާޓީގެ ސްޓިއަރިން ކޮމިޓީތަކުން 72 ގަޑިއިރު ތެރޭގައި ވޯޓަކުން ކަނޑައަޅަންޖެހޭ އިތުރު، މަގާމުތައް ކަނޑައެޅުމުގެ މަސައްކަތް ކުރިއަށްދާނީ ދާއިމީ ނަތީޖާ އިއުލާނުކުރުމަށްފަހު ކަމަށްވެސް ޕީއެންސީން ބުންޏެވެ.
މާލެ އާއި އަތޮޅުތެރޭގެ، 88 ރަށެއްގައި ވޯޓުލުން ކުރިޔަށް ދިޔައެވެ.

Ad by Hajj Corporation

​​​1984 މަޤާމަށް މީހުން އިންތިޚާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރި އެވެ. އަނެއް 1300 މަޤާމަށް، އެންމެ ކެންޑިޑޭޓަކު ކުރިމަތިލައްވާފައިވާތީ، އެ 1300 މަޤާމަށް ވަނީ، އިންތިޚާބަކާ ނުލައި މީހުން ހޮވިފައެވެ. މާލެ އާއި އަތޮޅުތެރޭގައި އިންތިޚާބު އޮންނަ 88 ރަށުގައި ވޯޓް ލުމުގެ ޙައްޤު ލިބިފައިވާ، 33500 މެމްބަރުން އެބަތިއްބެވެ.