ޔުއޭފާ ޗެންޕިއަންސްލީގުގައި ރޭގައި ލިވަރޕޫލާއި މެޑްރިޑް ބައްދަކުރި މެޗު ލިވަރޕޫލް ކާމިޔާބުކޮށްފިއެވެ. ލިވަރޕޫލުގެ އަމިއްލަ ދަނޑުގައި ކުޅުނު މިމެޗު އެޓީމުން ކާމިޔާބުކުރީ 2-0 އިންނެވެ.

Ad by Hajj Corporation

ލިވަރޕޫލުން ވަނީ ރޭގެ މެޗުގެ ބޮޑުބައެއް ކޮންޓްރޯލްކޮށްގެން ކުޅެ ނުރައްކާތެރި ގިނަ ހަމަލާތަކެއް މެޑްރިޑްގެ ގޯލަށް ފޮނުވާލާފައެވެ. އެގޮތުން ލިވަރޕޫލުގެ ފުރަތަމަ ގޯލުޖެހީ އާރޖެންޓީނާ ގެ މިޑްފީލްޑަރ މެކަލިސްޓަރ އެވެ. މެޗުގެ ނަތިޖާ ހަމަކުރުމަށް މެޑްރިޑަށް ލިބުނު ފުތުސަތު ވަނީ ގެއްލުވާލާފައެވެ. އެގޮތުން 61 ވަނަ މިނެޓުގައި އެމްބާއްޕޭ ޖެހި ފެނަލްޓީ ލިވަރޕޫލުގެ ގޯލް ކީފަރު ވަނީ ދިފާއުކޮށްފައެވެ. އަދި 70 ވަނަ މިނެޓުގައި ލިވަރޕޫލަށް ލިބުނު ޕެނަލްޓީ ވެސް ސަލާޙު ވަނީ ބޭރަށްޖަހާފައެވެ. ލިވަރޕޫލުގެ ފަހުގޯލަކީ ދެވަނަ ހާފުގައި ކުޅެއް ނިކުތް ގަކްޕޯ 76 ވަނަ މިނެޓުގައި ޖެހި ގޯލެކެވެ.

ރޭގެ މެޗަކީ ލިވަރޕޫލުން ރެއާލް އާއި ދެކޮޅަށް އެންމެ ފަހުން ކުޅުނު 9 މެޗުގެ ތެރެއިން މޮޅުވި ފުރަތަމަ މެޗެވެ. އެގޮތުން ރެއާލް މެޑްރިޑުން ވަނީ 2018 އާއި 2022 ގައި މުބާރާތުގެ ފައިނަލުގައި ލިވަރޕޫލް ބަލިކޮށް 2021 ވަނަ އަހަރާއި 2023 ވަނަ އަހަރު ލިވަރޕޫލު ނޮކްއައުޓް ސްޓޭޖުން މުބާރާތުން ބޭރުކޮށްފައެވެ. މިއީ 2009 ގެ ފަހުން ލިވަރޕޫލުން މެޑްރިޑް އާ ދެކޮޅަށް ކުޅެ ބަލިވުމުގެ ސިލްސިލާ ނިމުމަކަށް ގެނެވުނުމެޗެކެވެ. ރޭގެ މެޗުގައި ރެއާލްމެޑްރިޑްގެ ފުރަތަމަ 11 ގެ 6 ކުޅުންތެރިޔެއް އަނިޔާގެ ސަބަބުން ނުކުޅެއެވެ.

ރޭގެ މޮޅާއެކު ލިވަރޕޫލު ވަނީ މުބާރާތުގައި ކުޅުނު ހުރިހާ މެޗަކުން މޮޅުވެ 15 ޕޮއިންޓާއެކު ތާވަލުގެ 1 ވަނައިގައެވެ. މި މޮޅާއެކު އެޓީމުން ވަނީ ގަދަ 8 ގެ ޖާގައެއް ކަށަވަރުކޮށްފައެވެ. އަދި މެޑްރިޑް އޮތީ ކުޅުނު 5 މެޗުން ލިބުނު 6 ޕޮއިންޓާއެކު ތާވަލުގެ 24 ވަނައިގައެވެ. މިއީ ގަދަ 16 ނޮކްއައުޓް ސްޓޭޖަށް ކޮލިފައިވާ އެންމެ ދަށް ރޭންކެވެ.