ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ގުޅުވައި ޝޯސަލް މީޑިއާގައި ކުރަމުންއަންނަ ތުހުމަތުދޮގުކޮށް، އެ މައްސަލާގައި އަވަސް ތަހުގީގެއް ހިންގައިދިނުމަށް އެ އޭޖެންސީގެ ފަރާތުން އެންޓި ކޮރަޕްޝަން ކޮމިޝަން (އޭސީސީ)ގައި މިރޭ އެދެފިއެވެ.

ސޯޝަލްޑިއާގައި އެ އޭޖެންސީ ހިންގަން އޮފީސް އިމާރާތެއް ހޯދަން 34.8 މިލިއަން ރުފިޔާގެ މުއާމަލާތެއް ގޭގެ ވެރިފަރާތް ނޫން އެހެން ފަރާތަކާ ކުރިކަމަށް ބުނެ އަންނަނީ އަޑުފަތުރަމުންނެވެ.

އެންސްޕާއިން މިރޭ އޭސީސީއަށް ފޮނުވި ސިޓީއެއްގައި ވަނީ އެކަން ދޮގުކޮށްފައެވެ. އަދި އެ އޭޖެންސީ އަށް އިމާރާތެއް ހޯދުމާއި ގުޅުވައިގެން ބައެއް ނޫސްތަކުން ޙަޤީޤަތާއި ޚިލާފް ވާހަކަތައް ފަތުރަމުން އަންނަކަމަށް ވަނީ ބުނެފައެވެ.

އެންސްޕާގެ ސިޓީގައި ބުނެފައި ވަނީ، ރައްޔިތުންގެ އިޖުތިމާއީ ރައްކާތެރިކަމާއި ގުޅުންހުރި އެންސްޕާ ފަދަ މުއައްސަސާ އަކާއި ގުޅޭގޮތުން އަދި އެ މުއައްސަސާގެ މުވައްޒަފުންގެ ނަޒާހަތްތެރިކަމާމެދު ރައްޔިތުންގެ މެދުގައި ކަންބޮޑުވުމާއި ޝައްކު އުފެދޭގޮތަށް މައުލޫމާތު ފަތުރަމުންދާތީ އެކަމާއި ގުޅޭ މިނިވަން ތަޙްޤީޤެއް ވީއެންމެ އަވަހަކަށް ހިންގައި، އެކަމުގެ ޙަޤީޤަތް ރައްޔިތުންނަށް ހާމަކޮށްދިނުމަކީ އެ އޭޖެންސީގެ ވަރަށް ބޮޑު އެދުމެއްކަމަށެވެ.

އެހެންކަމުން މިކަމާއި ގުޅިގެން އޭސީސީގެ ފުރިހަމަ ތަޙްޤީޤެއް ކުރިއަށް ގެންގޮސްދެއްވުމަށްފަހު އެ ރިޕޯޓު ވީއެންމެ އަވަހަކަށް އެ އެޖެންސީއާއި ހިއްސާކޮށްދެއްވުން އެދޭކަމަށް އެންސްޕާގެ ސިޓީގައި ބުނެފަވެއެވެ.