ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގަން އިމާރާތެއް ހޯދަން ކުރި މުއާމަލާތްތަކާ ގުޅިގެން ކުރެވޭ ތުހުމަތުގެ މައްސަލަ، އެންޓި ކޮރަޕްޝަން ކޮމިޝަން (އޭސީސީ)އިން ރެޖިސްޓާކޮށްގެން ބަލަން ފަށައިފިއެވެ.

އޭސީސީން ވަނީ މައްސަލަ ބަލަމުންދާކަން މެންދުރު ޓީވީއަށް ކަށަވަރުކޮށްދެއްވާފައެވެ. އެހެންނަމަވެސް އިތުރު ތަފްސީލް ދީފައެއްނުވެއެވެ.

އެންސްޕާއިން އެ އިމާރާތް ކުއްޔަށް ހިފީ އެމްއެމްޓީވީ މެދުވެރިކޮށް ކަމަށް ބުނެ ތުހުމަތުތަކެއް ވަނީ އެންސްޕާއަށް އަމާޒުވެފައެވެ.

އެ ތުހުމަތުތަކަށް ރައްދުދީ އެންސްޕާއިން ހުކުރު ދުވަހުގެ ރޭ ނެރުނު ބަޔާނުގައި ބުނީ އެ އެޖެންސީ ހިންގަން އިމާރާތް ހޯދަން ކުރި މުއާމަލާތަކީ މާލީ ވުޒާރާއާއި އެ އެޖެންސީއާ ދެމެދު ގަވައިދާއެއް ގޮތަށް ހިންގި މުއާމަލާތެއް ކަމަށެެވެ.

"މި އޭޖެންސީ ހިންގަން އިމާރާތެއް ހޯދުމުގެ މުއާމަލަތަކީ މާލީ ވުޒާރާ އާއި މި އޭޖެންސީ އާ ދެމެދު އެކަން ކުރުމަށް ކަނޑައެޅިފައިވާ ގަވާއިދާއި އުސޫލުގެ ތެރެއިން ކުރެވިފައިވާ މުއާމަލާތެއް. އެއީ މި އޭޖެންސީ އާއި އެހެން އެއްވެސް ފަރާތަކާ ދެމެދު ކުރެވިފައިވާ މުއާމަލާތެއް ނޫން"

އެންސްޕާއިންވަނީ އޮފީސް ހިންގަން އިމާރާތެއް ހޯދަން ކުރި މުއާމަލާތްތަކާ ގުޅޭގޮތުން ތުހުމަތު ކުރެވޭ މައްސަލަ ބަލައިދިނުމަށް އޭސީސީގައި އެދިފައެވެ.

އެންސްޕާއިން ބުނީ އެ އޭޖެންސީ ހިންގަން މުވައްޒަފުން ހޯދުމާއި އެ މުވައްޒަފުންގެ ޒިންމާތައް ހަވާލު ކުރުމަކީ ވެސް އެކަމަށް ކަނޑައެޅިފައިވާ އުސޫލުގެ ތެރެއިން ކުރަމުންދާ ކަންކަންކަމަށެވެ.