ނޭޝަނަލް ސޯޝަލް ޕްރޮޓެކްޝަން އޭޖެންސީ ހިންގުމަށް ތަނެއް ކުއްޔަށް ނެގުމަށް ހެދި އެއްބަސްވުން ނިމުމަކަށް ގެނައުމަށް އެ އެޖެންސީން ނިންމައިފިއެވެ.މި އެއްބަސްވުން ނިމުމަކަށް ގެނައުމަށް ނިންމެވީ އެތަން އެންސްޕާއިން ކުއްޔަށް ދިން ކުންފުނީގެ އެދުމުގެ މަތީންކަމަށް އެންސްޕާއިން ވިދާޅުވެއެވެ.

އެއިދާރާއިން މިކަން ހާމަކޮށް ނެރުނު ނޫސް ބަޔާނެއްގައި ބުނެފައިވަނީ އެ އޭޖެންސީ ހިންގަމުންދާ "މޫކައި ސުއިޓްސް" އިމާރާތް މަރާމާތު ކުރުމަށްޓަކައި ހުސްކުރުމަށް އަންގާފައިވާ ކަމަށާއި ވުމާއެކު އެ އޭޖެންސީ ހިންގާނެ ތަނެއް ހޯދުމަށް މާލީ ވުޒާރާގެ އޯޕަން ޓެންޑާ އިން ހުޅުވާލައިގެން ކަނޑައެޅިފައިވާ ގަވައިދުތަކާއި އުސޫލުތަކުގެ މަތިން އެވޯޑްކޮށް އެ އޭޖެންސީ ހިންގުމަށް ލިބިފައިވާ އިމާރާތުގެ ފަންގިފިލާތައް މޯލްޑިވްސް މީޑިޔާ ހައުސް އިން ކުއްޔަށް ހިފުމުގެ މަސައްކަތް ކޮށްފައިވާ ކަމަށެވެ.

އެ މުއާމަލާތާއި ގުޅިގެން މޯލްޑިވްސް މީޑިޔާ ހައުސްގެ އަގު ވައްޓާލާ ބަދުނާމުކުރުމަށް ހަގީގަތާއި ހިލާފު އެތަށް ވާހަކަތަކެއް ދައްކާ، މީޑިޔާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިއުމުގެ ސަބަބުން އެ ކުންފުންޏަށް މާލީ ގޮތުންނާއި މައުނަވީ ގޮތުން ފޫނުބެއްދޭވަރުގެ ބޮޑު ގެއްލުމަކާއި ކުރިމަތިވެފައިވާތީ އެ އެއްބަސްވުން ނިމުމަކަށް ގެނައުމަށް އެ ކުންފުނިން ހުށަހަޅާފައިވާ ކަމަށް ވެސް އެ ބަޔާނުގައި ވެއެވެ.

މީގެ އިތުރުން އެ ބަޔާނުގައި ބުނެފައިވަނީ މާލީ ވުޒާރާ އާއި މަޝްވަރާކުރުމަށްފަހު އެ އެއްބަސްވުން ނިމުމަކަށް ގެނައުމަށް އެ އޭޖެންސީ އިން ނިންމާފައިވާ ކަަމަށާއި މި ކަމާއި ގުޅިގެން އިތުރަށް ކުރަންޖެހޭ މުއާމަލާތްތައް ކުރުމާއި މި އެއްބަސްވުން ނިމުމަކަށް ގެނައުމަށްފަހު ފުރިހަމަކުރަންޖެހޭ އިޖުރާއަތްތައް ފުރިހަމަކުރުމުގެ މަސައްކަތް މާލީ ވުޒާރާގެ އިރުޝާދުގެ ދަށުން ކުރަމުން އަންނަ ކަމަށެވެ.