އިއްޔެ އިރުއޮއްސުނު ވަގުތު މާލޭގެ އާޓިފިޝަލް ބީޗުގައި ހިންގި ހަމަނުޖެހުމުގައި ބައިވެރިވި ބިދޭސީންނާ މެދު ފިޔަވަޅު އަޅާނެ ކަމުގައި ކޮންޓްރޯލާ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވެއްެޖެއެވެ.

"އެކްސް"ގައި ކުރެއްވި ޕޯސްޓެއްގައި ޝަމްއާން ވިދާޅުވީ، އާޓިފިޝަލް ބީޗު ސަރަހައްދުގައި މާރާމާރީ ހިންގައި އާއްމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ އިމިގްރޭޝަނުގެ ޓާސްކް ފޯސް އިން ބަލަމުންދާ ކަމަށާއި، އެ ކަމުގައި ޝާމިލުވާ ބިދޭސީންނަށް ފިޔަވަޅު އަޅާނެ ކަމުގެ ޔަގީންކަން އަރުވާ ކަމަށެވެ.

ޝަމްއާން އެފަދައިން ވިދާޅުވީ، އިއްޔެ ހަވީރު އާޓިފިޝަލް ބީޗުގައި، އިންޑިޔާގެ ދެ ގްރޫޕެއްގެ ދެމެދުގައި ހަމަނުޖެހުން ހިންގައި، މާރާމާރީއެއް ހިންގުމާ ގުޅިގެން އާންމުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ. އެ މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައެއް ނުވެއެވެ.