މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އާއި ޓޫރިޒަމް ދާއިރާގެ ޖަމިއްޔާތަކެއް ގުޅިގެން އަޒަރުބައިޖާނާއި ޖޯޖިއާގައި ރާއްޖެ އިޝްތިހާރުކުރަން ތައްޔާރުވެއްޖެއެވެ.

އަޒަރުބައިޖާނާއި ޖޯޖިއާގައި ރާއްޖެ އިޝްތިހާރުކުރަން ތައްޔާރުވެފައި ވަނީ ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭއެމް) އާއި މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އަދި މޯލްޑިވްސް އެސޯސިއޭޝަން އޮފް ޓްރެވެލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) ގުޅިގެންނެވެ.

މިގޮތުން 'އައި އެމް މޯލްޑިވްސް ރޯޑްޝޯ'ގެ ނަމުގައި އަޒަރުބައިޖާނުގެ ބާކޫގައި އާއި ޖޯޖިއާގެ ތިބިލީސީގައި ބާއްވާ ހަރަކާތްތަކުގައި ރާއްޖެ އިޝްތިހާރު އޮންނާނީ މިމަހުގެ 17އިން 20އަށެވެ.

އެ ރޯޑްޝޯގެ މަގުސަދަކީ، ރާއްޖެއަކީ ފަތުރުވެރި މަންޒިލެއްގެ ގޮތުގައި އެ ސަރަހައްދުގައި އިޝްތިހާރު ކުރުން ކަމަށް މިކަމުގެ އެއް ބައިވެރިއެއްކަމަށްވާ، ގެސްޓްހައުސް އެސޯސިއޭޝަނުން ބުންޏެވެ.

މި ހަރަކާތްތަކުގައި ރާއްޖޭގެ ރިޒޯޓުތަކައި ހޮޓެލްތަކާއި ގެސްޓްހައުސްތަކާއި ޓްރެވެލް އޭޖެންސީތައް ހިމެނޭ ގޮތަށް 18 ފަރާތަކުން ބައިވެރިވެ، ބޭރުގެ ވިޔަފާރިތަކާ ގުޅުން ބަދަހިކުރުމުގެ މަސައްކަތްކުރާނެއެވެ.