ރާއްޖޭގެ ފަތުރުވެރިކަން ވަކި ބާވަތެއްގެ ފަތުރުވެރިކަމަށް ބަރޯސާވެފައި އޮންނަ އޮތުން ބަދަލުކޮށް ފަތުރުވެރިކަން ސިންދަފާތު ކުރުމުގެ މަސައްކަތް އަންނަ އަހަރު ފެށިގެންދާނެކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވެއްޖެއެވެ.

"ވެލްކަމް އިންޑިއާ" ރޯޑް ޝޯ ނިންމާލުމަށްފަހު ފަތުރުވެރިކަމާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި، ވާހަކަ ދައްކަވަމުން އެމްއެމްޕީއާރްސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވީ، ރާއްޖެއަކީ ޤުދުރަތީ މުއްސަނދިކަމެއް ލިބިފައިވާ ޤައުމެއްކަމަށެވެ. 

Ad by Hajj Corporation

ވޭތުވެދިޔަ 50 އަހަރުވެސް ފަތުރުވެރިކަން ބަރޯސާވެފައި އޮތީ، ޑައިވް މަންޒިލެއްގެ ގޮތުގައި ނުވަތަ ހަނީމޫން މަންޒިލެއްގެ ގޮތުގައި ނަމަވެސް ކުޅިވަރު ފަތުރުވެރިކަމާއި، ފިލްމީ ފަތުރުވެރިކަމާއި، އަދި ތަޢުލީމުގެ ފަތުރުވެރިކަން ރާއްޖެއަށް ތަޢާރަފްކޮށް ކުރިއަށް ގެންދެވޭނެކަމަށް އެމްއެމްޕީއާރްސީގެ މިހާރު މެނޭޖިންގ ޑިރެކްޓަރ ޝިއުރީ ޤަބޫލުކުރައްވައެވެ.

އެގޮތުން ރާއްޖޭގައި ސްޓަރ ވަރސް މީގެ ކުރިން ޝޫޓް ކޮށްފައިވާއިރު، އެފަދަ ފިލްމްތަކުގެ މަންޒަރުތައް ނަގާ މަންޒިލްތައް ބާލާލަންދާ ފަތުރުވެރިން ތިބޭ ކަމަށް ޝިއުރީ ފާހަގަކުރެއްވިއެވެ. މީގެ އިތުރުން ދުނިޔޭގެ ބޮޑެތި ކުޅިވަރު މުބާރާތްތައް ރާއްޖޭގައި ބޭއްވުމުގެ ފުރުޞަތުވެސް އޮތްކަން ފާހަގަކުރައްވައި ޝިއުރީ ވިދާޅުވީ ލޯ ސީޒަން ތަކުގައި ބޭރުގެ ޔުނިވާސިޓީތަކާއެކު އެއްބަސްވުންތަކެއް ހެދިއްޖެނަމަ އެތަނުގެ ދަރިވަރުން، ކޭމްޕްތަކާއި އެކްސްޗޭންޖް ޕްރޮގްރާމުތަކުގައި ގެނައުމުގެ ފުރުޞަތުވެސް އޮތް ކަމަށެވެ.

ފަތުރުވެރިކަން މިހާރަށްވުރެ ބޮޑަށް ފުޅާވާންޖެހޭކަން ފާހަގަކޮށް އެމްއެމްޕީއާރްސީން ވިދާޅުވީ، ރާއްޖޭގެ ފަތުރުވެރިކަމަށް އައު ކަންތައްތަކެއް ތަޢާރަފް ކުރެވި އައު މާކެޓުތަކަށް ދާންޖެހޭ ކަމަށެވެ. އަދި މިއީ ކުރެވިދާނެ ކަމެއްގެގޮތުގައި ޤަބޫލުކުރައްވާކަމަށް ވިދާޅުވެ އެމްއެމްޕީއާރުސީގެ އެމްޑީ ވަނީ އެމަސައްކަތް އަންނަ އަހަރު ފެށުމަށް ރާވަމުންދާކަން ހާމަކުރައްވާފައެވެ.