ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާ ގޮތުން، މި އަހަރުގެ މިހާތަނަށް ރާއްޖެއަށް 1.3 މިލިއަން ފަތުރުވެރިން ޒިޔާރަތްކޮށްފި އެވެ.

މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 3 އިންސައްތައިގެ ދަށްވުމެކެވެ. ނަމަވެސް އޮގަސްޓު މަހުގެ ތެރޭގައި ފަތުރުވެރިން އަންނަ ނިސްބަތް އިތުރުވާން ފަށާފައިވާއިރު، މި މަހުގެ މިހާތަނަށް ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 2.6 އިންސައްތައިގެ ކުރިއެރުމެކެވެ.

Ad by Hajj Corporation

މި އަހަރު ރާއްޖެއަށް ޒިޔާރަތްކުރީ ފަތުރުވެރިންގެ ތެރެއިން އެންމެ ބޮޑު ނިސްބަތެއް ހިއްސާކުރަނީ ޒުވާން އުމުރުފުރައިގެ އަންހެނުންނެވެ. އެގޮތުން 65 އަހަރުން މަތީގެ އުމުރުފުރާ ފިޔަވައި އެހެން ހުރިހާ އުމުރުފުރާތަކެއްގައިވެސް ފިރިހެނުންނަށްވުރެ އަންހެނުންގެ އަދަދު ގިނައެވެ. ޖުމްލަ ފަތުރުވެރިންގެ 14 އިންސައްތައަކީ 25 އަހަރާއި 34 އަހަރާ ދެމެދުގެ އަންހެނުންނެވެ. ދެވަނައަށް އެންމެ ގިނައީ 35 އަހަރާއި 44 އަހަރާ ދެމެދުގެ އަންހެން ފަތުރުވެރިން ކަމަށްވާއިރު، އެއީ ޖުމްލަ ފަތުރުވެރިންގެ 11.8 އިންސައްތައެވެ. އަދި ތިންވަނައަށް އެންމެ ގިނައީ 14 އަހަރުން ދަށުގެ ކުޑަކުދިންނެވެ. ފިރިހެން ފަތުރުވެރިންނަށް ބަލާއިރުވެސް ރާއްޖެއަށް އެންމެ ގިނައިން ޒިޔާރަތް ކޮށްފައި ވަނީ ޒުވާން އުމުރުފުރައިގެ މީހުންނެވެ.

ވަކިވަކި މާކެޓުތަކަށް ބަލާއިރު، މިހާރު ރާއްޖެއަށް އެންމެ ގިނައިން ފަތުރުވެރިން އަންނަނީ ޗައިނާ އަދި ރަޝިއާއިންނެވެ. މި ދެ ގައުމުގެ ކޮންމެ ގައުމަކުންވެސް 2 ލައްކައަށްވުރެ ގިނަ ފަތުރުވެރިން ވަނީ ރާއްޖެ އައިސްފައެވެ. އަދި ތިންވަނައިގައި އޮތް އިނގިރޭސިވިލާތުން 1 ލައްކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.