މިއަންނަ އަހަރު ފާހަގަކުރުމަށް ހަމަޖެހިފައިވާ ރާއްޖެއަށް ޒިޔާރަތްކުރުމުގެ އަހަރު ނުވަތަ 'ވިޒިޓް މޯލްޑިވްސް އިޔަރ' ގެ ކެމްޕެއިން ރަސްމީކޮށް އިފްތިތާޙްކޮށް، ރާއްޖޭގެ ފަތުރުވެރިކަމުގެ އެވޯޑު ދޭނެ މުޅިން އައު ދާއިރާތަކެއް އިއުލާންކޮށްފިއެވެ. އަންނަ އަހަރަކީ 'ވިޒިޓް މޯލްޑިވްސް އިޔަރ' ގެ ގޮތުގައި ފާހަގަކުރަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރެއްވީ މިއަހަރުގެ ރިޔާސީ ބަޔާނުގައެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި މި ކެމްޕެއިން އިފްތިތާޙްކޮށްދެއްވީ ފަތުރުވެރިކަމާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން އަދި މި ރަސްމިއްޔާތުގެ ޙާއްސަ މެހެމާން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ޗެއަރޕާސަން ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙުސައިން ޢަފީފެވެ. މި ރަސްމިއްޔާތުގައި ކެމްޕެއިން އިފްތިތާޙް ކުރުމުގެ އިތުރުން ކެމްޕެއިންގެ ރަސްމީ ލޯގޯ، ރަސްމީ ލަވަ އަދި ބްރޭންޑިން ވަނީ އާންމުކޮށްފައެވެ.

Ad by Hajj Corporation

ރަސްމިއްޔާތުގައި ވާހަކަފުޅުދައްކަވަމުން ފަތުރުވެރިކަމާ ބެހޭ ވަޒީރު މުހައްމަދު އަމީން ވިދާޅުވީ، މިއީ ހުރިހާ އެންމެންގެ ޝާމިލްވުން އޮންނަ ޤައުމީ ކެމްޕެއިނެއް ކަމަށެވެ. އެހެންކަމުން ކޮންމެ ރަށަކާއި ރިސޯޓަކާއި އަދި މި ސިނާޢަތުގެ ހުރިހާ ފަރާތްތަކެއްގެ ބައިވެރިވުން މި ކެމްޕެއިންގެ ތެރެއިން އޮތުމަކީ ނުހަނު މުހިންމު ކަމެއް ކަމުގައި ވަޒީރު ފާހަގަކުރެއްވިއެވެ.

ޓޫރިޒަމް އެވޯޑަށް ތަޢާރަފްކުރި އައު ދާއިރާތައް

2022 ވަނަ އަހަރުން ފެށިގެން ދެމުން އައި ފަތުރުވެރިކަމުގެ އެވޯޑު ކުރިން ދެމުން އައީ ހަމައެކަނި ރިސޯޓު، ހޮޓާ، ގެސްޓްހައުސް އަދި ސަފާރީ ފަދަ ތަންތަނަށެވެ. ނަމަވެސް، ޚިދުމަތްތަކުގެ އިތުރުން އެ ޚިދުމަތް ފޯރުކޮށްދޭ ފަރާތްތަކާއި ގޮތްތައް އަގުވަޒަންކުރުމުގެ މަޤްޞަދުގައި އަންނަ އަހަރުން ފެށިގެން 4 ދާއިރާއަކުން އެވޯޑު ދިނުމަށް ވަނީ ކަނޑައަޅާފައެވެ.

އެގޮތުން އަލަށް ކަނޑައެޅި ދާއިރާތަކަކީ އިންސާނީ ވަސީލަތް ބިނާކުރުމުގެ ދާއިރާ (މުވައްޒަފުންގެ ދުޅަހެޔޮކަން، މުވައްޒަފުން ބިނާކުރުން އަދި އަންހެނުން ބާރުވެރިކުރުން)، ދެމެހެއްޓެނިވިކަމުގެ ދާއިރާ (އިޖްތިމާޢީ ބައިވެރިވުން، ސަޤާފަތާއި ތަރިކަ ޕްރޮމޯޓްކުރުން އަދި ތިމާވެށީގެ ދެމެހެއްޓެނިވިކަން)، ޒިޔާރަތްކުރާ މީހުންގެ ތަޖުރިބާގެ ދާއިރާ (ޓްރެވެލް އޭޖެންސީ، އެކޮމޮޑޭޝަން، ޑައިވް/މޫދު ކުޅިވަރު އަދި އަލަށް ތަޢާރަފްކުރި ރަށްރަށުގެ އެވޯޑު)، އަދި ފަރުދީ ފެންވަރެއްގައި ފާހަގަކޮށްލެވޭ ފަރާތްތަކުގެ ދާއިރާ (ޓުއަރ ގައިޑިން، މަންޒިލު ކުރިއެރުވުން، އީޖާދީ މަސައްކަތް، ހުނަރު ތަރައްޤީކުރުން، ޚިދުމަތުގެ ފަންވަރު އަދި ވާހަކަތައް ހިއްސާކުރާ އައު ލީޑަރުން) އެވެ.

ފަތުރުވެރިކަމާ ބެހޭ ވުޒާރާއިން ހާމަކުރި ގޮތުގައި، މި އެވޯޑުތަކުގެ ތެރެއިން ރަށްރަށުގެ އެވޯޑަށް ކުރިމަތިލުމުގެ ފުރުޞަތު ރަށު ކައުންސިލްތަކަށް އޮންނައިރު، އެހެނިހެން ދާއިރާތަކަށް ރިސޯޓު، ގެސްޓްހައުސް އަދި ހޮޓާތަކަށް ކުރިމަތިލެވޭނެއެވެ. މި އެވޯޑުތަކަށް ކުރިމަތިލުމުގެ ފުރުޞަތު އަންނަ އަހަރުގެ ފުރަތަމަ ކުއާޓަރުގައި ރަސްމީކޮށް ހުޅުވާލުމަށް ވަނީ ހަމަޖެހިފައެވެ.