ސީރިއާގައި ވެރިކަންކުރަމުން އައި ބައްޝާރު އަލް އަސަދުގެ އާއިލާގެ 54 އަހަރުވީ ވެރިކަން ނިމުމަކަށް ގެނެސް ތަޙްރީރް އަލް-ޝާމް ޖަމާއަތުންވަނީ ބޮޑު ކާމިޔާބީއެއް ހޯދާފައެވެ. ސީރިޔާގެ ހުޅަނގު އުތުރުގައި އޮތް ހަލަބަށް ދިން ކުއްލި ނުރައްކާތެރި ހަމަލާތަކާއި އޭގެ ފަހުން ހުޅަނގު އުތުރުގައި އޮންނަ އިދްލީބާއި ހަމާއާއި ހުމްސަށް ދިން ކާމިޔާބު ހަމަލާތަކަކީ ސީރިއާގެ ވެރިކަމުގައި ހުންނެވި ބައްޝާރު އަލް އަސަދު ވެރިކަން ދޫކުރައްވައި ފިއްލަވަންޖެހުނު މައިގަނޑު ކަންކަމެވެ. މި ކުއްލި ބަދަލުތައް ގެނުވި ހަމަލާގެ ފަސްފަހަތުގައި ހުރީ ތަޙްރީރް އަލް-ޝާމް ޖަމާއަތު ގެ އިސްވެރިޔާ އަބޫ މުހައްމަދު އަލް ޖުލާނީ އެވެ.

ސީރިއާގެ ވެރިކަމުން ބައްޝާރު ދުރުކުރުމަށް 2011 ވަނަ އަހަރު ފެށި މުޒާހަރާތައް ހޫނުވެ ދާހިލީ ހަނގުރާމައަކަށް ބަދަލުވުމާއެކު ސަރުކާރާ ދެކޮޅު އެތައް ޖަމާއަތްތަކެއް އުފެދެން ފެށުނެވެ. ޖަބުހަތުލް ނުޞްރާގެ ނަމުގައި އޭރު ހަރަކާތްތެރިވި ތަޙްރީރް އަލް-ޝާމްއަކީ ސީދާ އަލްގައިދާއާ އޭރު ގުޅުން އޮތް ބައެކެވެ.

ނަމަވެސް އަލް-ޖޫލާނީ ފަހުން ވަނީ އަލް-ޤާޢިދާއާ އެކު އޮތް ގުޅުން ކަނޑާލައި ޖަބުހަތުލް ނުޞްރާ އުވާލައިފައެވެ. އަދި ތަޙްރީރް އަލް-ޝާމްގެ ނަމުގައި އުފެއްދި މުޅިން އައު ޖަމާއަތުގެ އެންމެ ބޮޑު މަގުސަދަކަށް ވެފައި އޮތީ ސީރިއާގައި "އިސްލާމީ ޖުމްހޫރިއްޔާ" އެއް އުފެއްދުމެވެ.

އަބޫ މުހައްމަދު އުފަންވެވަޑައިގަތީ 1982 ވަނަ އަހަރު ސައުދީ އަރަބިއްޔާގެ ރިޔާޟަށެވެ. އޭނާއަކީ ކުޅާދާނަ އިންޖިނިއަރެކެވެ. ނަމަވެސް 1989 ވަނަ އަހަރު އޭނާގެ އާއިލާ ސީރިއާއަށް ގޮސް ދިމިޝްގު ކައިރީގައި ވަޒަންވެރިވިއެވެ. އޭގެ ފަހުން އިރާގަށް ދިރިއުޅުން ބަދަލުކޮށް އަލްގައިދާއާ ގުޅުނެވެ. 2006 ވަނަ އަހަރު އިރާގުގައި އެމެރިކާ ސިފައިން އޭނާ ހައްޔަރުކޮށް ފަސް އަހަރު ވަންދެން ޖަލުގައި ބޭއްވިއެވެ.ޖަލުން މިނިވަންވެ އަލް ގާއިދާގެ އަލް ނުސްރާ ފްރަންޓް އުފެއްދުމުގެ މަސައްކަތް އޭނާ ކޮށްފައިވެއެވެ. މީގެ ކުރިން އަލްގައިދާއަކީ އައިއެސްއައިއެސްގެ ވެރިޔާ އަބޫބަކުރު އަލް ބަޣްދާދީއާ ވެސް ގުޅުން އޮތް ބައެކެވެ. ނަމަވެސް ފަހުން އެ ހުރިހާ ގުޅުމެއް ވަނީ ކަނޑާލާފައިއެވެ.

2014 ވަނަ އަހަރު އޭނާގެ ފުރަތަމަ ޓީވީ އިންޓަވިއު އަލްޖަޒީރާއަށް ދެމުން އަބޫ މުހައްމަދު ވިދާޅޔުވެފައިވަނީ ސީރިއާއިން ނަސްރާނީންނާއި އަލަވީންނަށް ޖާގައެއް ނެތްކަމަށެވެ. އަދި އެ ގައުމުގައިު ވެރިކަން ކުރަންޖެހޭނީ އިސްލާމް ދީނުގެ ޝަރީއަތާއި އެއްގޮތަށްކަމަށް ވިދާޅުވިއެވެ.

2016 އަދި 2017 ވަނަ އަހަރު އެ ޖަމާއަތް ބޮޑު ކޮށް އިތުރަށް ވަރުގަދަކުރުމަށްފަހު އިދްލީބްގެ ވެރިކަން އެންމެ އަހަރެއްގެ ތެރޭގައި ހޯދާ ހިންދަމާލިއެވެ.

އަލްޖަޒީރާއިން ބުނާގޮތުގައިއަބޫ މުހައްމަދު ބޭނުންވަނީ ހަޔާތު ތަހުރީރު އަލް ޝާމްއަކީ ސީރިއާގައި ރައްޔިތުން އިތުބާރު ކުރާ ވެރިކަމެއް ކުރެވިދާނެ އަދި ދުނިޔޭގެ ޓެރަރިޒަމާ ދެކޮޅަށް ކުރާ މަސައްކަތުގައި ބައިވެރިވެދާނެ ފަރާތެއްގެ ގޮތުގައި ސީރިއާގެ ރައްޔިތުންނާއި އަދި ދުނިޔޭގެ އިތުބާރު ވެސް ހޯދާށެވެ.

ބައްޝާރުގެ އާއިލީ ދިގުވެރިކަން ވައްޓާލުމަކީ ފަސޭހަކަމެއްނޫނެވެ. ބައި ގަރުނު ވަންދެން ބައްޝާރު ވެރިކަން ދިފާއުކޮށް އެތައް ޖަމާއަތަކާއި ދެކޮޅަށް ކުރި ހަނގުރާމައިގެ އަމާޒު ފާއިތުވި ދިހަ ވަރަކަށް ދުވަސްތެރޭގައި އަނބުރާލާ ބައްޝާރަށް ވަފާތެރި ސިފައިންގެ ބާރު އެހައި ފަސޭހައިން ކަނޑުވާލުމަކީވެސް އާދައިގެ ހުނަރެއް ނޫންކަމަށް ބައިނަލްއަގްވާމީ މީޑިއާތަކުން ބުނަމުން އެބައާދެއެވެ.

ކޮންމެއަކަށް މި ފެށުނު ބޮޑު އިންގިލާބުގެ ސޫރިޔާގެ ސިޔާސީ މުސްތަޤުބަލު އެންމެ ބޮޑަށް ބަރޯސާވާނީ ތަހްރީރް އަލް ޝާމްގެ ގާބިލުކަމުގެ މައްޗަށެވެ. މިކަމުގެ ސީރިއާއަށް ބަސްކިޔާ ގައުމުތަކުގެ ނުފޫޒުވެސް ކުޑައެއް ނުވާނެއެވެ. އަސަދަށް ވާގިވެރިވާ އީރާނާއި ރަޝިޔާއާއި އިދިކޮޅު ހަނގުރާމަވެރިންނަށް ވާގިވެރިވާ ތުރުކީވިލާތުގެ އިތުރުން ކުރުދީންގެ ބާރުގެ ދަށުގައި އޮންނަ ސީރިޔާގެ އިރުމަތީ ސަރަޙައްދުތަކުގައި އަސްކަރީ ގޮތުން ހަރަކާތްތެރިވާ އަދި އިސްލާމީ ގައުމުތަކުގައި ހަންފަތުރަމުން އަންނަ އެމެރިކާ ވެސް މީގެ ތެރޭގައި ހިމެނެއެވެ.