އއ. މާޅޮހު ކައުންސިލްގެ ތިޖޫރީން ފަސް ލައްކައެއްހާ ރުފިޔާގެ ގެއްލި ގެއްލި އަދި އުސޫލުތަކާ ހިލާފަށް ޚަރަދުކޮށްފައިވާކަން ފާހަގަކޮށް، އެ މައްސަލަތައް ބަލައި، ފިޔަވަޅު އަޅަން އޮޑިޓާ ޖެނެރަލް އަންގަވައިފި އެވެ.

މިގޮތަށް އަންގާފައި ވަނީ އޮޑިޓް އޮފީހުން މިދިޔަ ހަފުތާގައި ނެރުނު މާޅޮހު ކައުންސިލްގެ އޮޑިޓް ރިޕޯޓުގައެވެ.

މި ރިޕޯޓުގައި މާޅޮހު ކައުންސިލްގެ ބޭންކް އެކައުންޓުތަކުންނާއި ތިޖޫރީން 2017 ވަނަ އަހަރާއި 2018 ވަނަ އަހަރު ނެގި ފައިސާގެ ތެރެއިން 492،867ރ. ގެއްލިފައިވާކަމަށް ވަނީ ފާހަގަކޮށްފައެވެ.

މި މުއްދަތުގައި އާމްދަނީގެ ގޮތުގައި 593،490ރ. ބަލައިގެންފައިވީ ނަމަވެސް ބޭންކަށް ޖަމާ ކޮށްފައިވަނީ އެހެނިހެން ފައިސާ ހިމެނޭ ގޮތަށް ޖުމްލަ 298،335ރ. ކަމަށް އޮޑިޓަ ޖެނެރަލްގެ ރިޕޯޓުގައި ވެ އެވެ.

ކައުންސިލްގެ އެކައުންޓުން ނެގި ފައިސާގެ ތެރެއިން ތިޖޫރީ އަށް ނުވައްދާ 255،584ރ. އާއި ކައުންސިލް އިދާރާގެ އެކި ބޭނުންތަކަށް ކަމަށް ބުނެ އޮޅުވާލައިގެން އެކައުންޓުން ނެގި 112،500ރ.ވެސް މީގެ ތެރޭގައި ހިމެނޭކަން އޮޑިޓަރޖެނެރަލްގެ ރިޕޯޓުގައި ވަނީ ފާހަގަކޮށްފައެވެ.

މީގެ އިތުރުން މުވައްޒަފުންނަށް މުސާރަ އާއި އެލަވަންސްގެ ގޮތުގައި ދޭންޖެހޭ ވަރަށް ވުރެ އިތުރަށް ތިޖޫރީ އާއި ބޭންކު އެކައުންޓުން ނެގި 82،579ރ. އާއި ނަގުދު ފައިސާގެ ތެރެއިން ކައުންސިލްގެ ބޭންކް އެކައުންޓަށް ޖަމާކުރަން ނެގި ފައިސާގެ ތެރެއިން 42،204ރ. ބޭންކް އެކައުންޓަށް ޖަމާކޮށްފައިނުވާ ކަމަށް އެ ރިޕޯޓުގައިވެ އެވެ.

މީގެ އިތުރުން ވެސް ގިނަ މައްސަލަތަކެއް މި ރިޕޯޓުގައި ފާހަގަކޮށްފަވެއެވެ.