އޮޑިޓަރ ޖެނެރަލް ޙުސައިން ނިޔާޒު، އޮޑިޓަރ ޖެނެރަލްގެ އޮފީހާއި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ އިސް ވެރިންނާ އެކު ތިލަފުށީގެ ކުނި މެނޭޖްކުރާ މަރުކަޒަށް މިއަދު ޒިޔާރަތްކުރައްވައިފިއެވެ.

Ad by Hajj Corporation

މި ޒިޔާރަތަކީ ތިލަފުށީގައި މިހާރު ކުރިއަށްދާ ކުނި މެނޭޖްކުރުމުގެ މަސައްކަތްތައް ބައްލަވާލެއްވުމަށާއި، ކުންޏާއި ވަސީލަތްތައް ބެލެހެއްޓުމުގައި ބޭނުންކުރަމުންދާ ނިޒާމުތަކާއި އިޖުރާއަތްތައް ގާތުން ބައްލަވައި، އެކަންކަމާ ގުޅޭ މަޢުލޫމާތު ހޯއްދެވުމުގެ މަޤްޞަދުގައި ކުރެއްވި ޒިޔާރަތެކެވެ.

މީގެއިތުރުން، މި ޒިޔާރަތުގައި ތިލަފުށީގައި ޒަމާނީ ފެންވަރަށް ކުނި މެނޭޖްކުރާ އިންފްރާސްޓްރަކްޗަރ ތަރައްޤީކުރުމަށްޓަކައި މިހާރު ކުރިއަށްދާ މަޝްރޫޢުތަކުގެ މަސައްކަތްތައް ވެސް ޓީމުގެ ބޭފުޅުން ވަނީ ބައްލަވާލައްވާފައެވެ. އަދި އެ މަޝްރޫޢުތަކުގެ އެންމެ ފަހުގެ މަޢުލޫމާތުތައް ވެސް ވަނީ އޮޅުންފިލުއްވާފައެވެ.

އެންވަޔަރަންމަންޓް މިނިސްޓްރީން ހާމަކުރި ގޮތުގައި، ކުނި މެނޭޖްކުރުމުގެ ދާއިރާއިން ދެވޭ ޚިދުމަތްތަކާއި ޤާއިމުކުރެވިފައިވާ ނިޒާމުތައް އިތުރަށް ހަރުދަނާކޮށް، ދެފުށް ފެންނަ ގޮތެއްގައި ޒިންމާދާރުކަން އިތުރުކުރުމަށް އެ މިނިސްޓްރީން އަބަދުވެސް މަސައްކަތްކުރަމުންދާނެއެވެ. އަދި މިފަދަ މަސައްކަތްތަކުގެ މައިގަނޑު މަޤްޞަދަކީ ރާއްޖެއަކީ ސާފުތާހިރު، ދެމެހެއްޓެނިވި ވެއްޓެއް އޮތް ޤައުމަކަށް ހެދުމަށް އެއްބާރުލުން ދިނުން ކަމަށް ވެސް އެ ވުޒާރާއިން ފާހަގަކޮށްފައިވެއެވެ.