ލުބްނާންގެ މުޖާހިދުންގެ ޖަމާޢަތް، ޙިޒްބުالله އިން ހަތިޔާރު ހޯދާ ބައެއް މަގުތައް ވަގުތީ ގޮތުން ބަންދުވެފައިވާ ކަމުގައި އެ ޖަމާޢަތުގެ ވެރިޔާ ނަޢީމް ޤާސިމް ވިދާޅުވެއްޖެއެވެ. އޭނާ މި ކަން ހާމަ ކުރައްވާފައި ވަނީ، ޙިޒްބުاللهން އަސްކަރީ ގޮތުން ވާގިވެރިވަމުން ދިޔަ ސީރިޔާގެ ރައީސް ބައްޝާރް އަލް-އަސަދުގެ ސަރުކާރު ވެއްޓުނު ފަހުން، ޓީވީ މެދުވެރި ކުރައްވައި ފުރަތަމަ ފަހަރަށް ލުބްނާންގެ ރައްޔިތުންނާ މުޚާޠަބު ކުރައްވައި ދެއްކެވި ވާހަކަފުޅުގައެވެ.

އަސަދުގެ ސަރުކާރު ވައްޓައިލުމުގެ އަޑީގައި އޮތީ، އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ތަޙްރީރް އަލް-ޝާމް (އެޗްޓީއެސެ)ވެ. އެ ޖަމާޢަތުގެ ހަނގުރާމަވެރިން ވެރިރަށް ދިމިޝްޤަށް އަރައި، އަސަދުގެ ވެރިކަމަށް ނިމުމެއް ގެނެސްފައި ވަނީ ޑިސެންބަރު 8ވަނަ ދުވަހުއެވެ. އެޗްޓީއެސްގެ ހަނގުރާމަވެރިން ދިމިޝްޤަށް އެރުމުން އަސަދު ވަނީ، އޭނާގެ ޢާއިލާއާ އެކު، ފިއްލަވައިގެން ރަޝިޔާއަށް ވަޑައިގަންނަވާފައެވެ. އަސަދާއި އޭނާގެ ޢާއިލާއަށް ޙިމާޔަތް ދިނުމަށް ނިންމާފައިވާ ކަން ރަޝިޔާގެ ރިޔާސީ ގަނޑުވަރު، ކްރެމްލިނުން ހާމަކޮށްފައިވެއެވެ.2011ވަނަ ސޫރިޔާގައި ފެށި ދާޚިލީ ހަނގުރާމައިގައި، ޙިޒްބުاللهން ވަނީ އަސަދުގެ ސަރުކާރަށް ވާގިވެރިވެދީފައެވެ. އަދި، 2013ވަނަ އަހަރުން ފެށިގެން ޙިޒްބުاللهގެ މެންބަރުން ދިޔައީ، އަސަދުގެ ސިފައިންނާ އެއް ސަފެއްގައި ހަނގުރާމަ ކުރަމުންނެވެ. ނަމަވެސް، އަސަދުގެ ސަރުކާރު ވެއްޓުމާ އެކު، ޙިޒްބުاللهގެ މެންބަރުން ވަނީ ސީރިޔާއިން ފައިބަން ފަށާފައެވެ. އަދި، އެ ކަން ވިލަރެސް ކުރުމަށް ޙިޒްބުاللهންގެ އިސް ކޮމާންޑަރުންގެ ވަފުދެއް ވަނީ ސީރިޔާއަށް ދަތުރު ކޮށްފައެވެ.

އެޗްޓީއެސުން އަސަދުގެ ވެރިކަމަށް ނިމުމެއް ގެނެސްފައި މި ވަނީ، ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް ހުއްޓުމަކަށް ގެނެސްފައިވާ ދަނޑިވަޅެއްގައެވެ. ޙިޒްބުاللهއާއި ޔަހޫދީ ފައުޖާ ދެމެދު ޙަމަލާ ބަދަލު ކުރަން ފަށާފައި ވަނީ، 2023 އޮކްޓޫބަރު 7ގައި ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފެށުމާ ގުޅިގެންނެވެ. ޙިޒްބުاللهގެ އަމާޒަކީ، ފަލަސްޠީނުގެ ރައްޔިތުންނާއި، މިނިވަން ކަމަށް ޖިހާދު ކުރަމުންދާ ޖަމާޢަތްތަކަށް ވާގިވެރިވުމެވެ.