ށ އަތޮޅުން ފެށިގެން އދ އަތޮޅަށް ރީނދޫ ސަމާލު މޫސުމާ ބެހޭ ގައުމީ އިދާރާ (މެޓް އޮފީހުން) ނެރެފިއެވެ.

މެޓް އޮފީހުން ބުނީ، ބަންގާޅު ކަނޑުގައި މިއަދުގެ ވަގުތެއްގައި ކޮޅިގަނޑެއް އުފެދި ކުރިއަށް އޮތް ދެ ދުވަސް ތެރޭގައި ދެކުނު އިންޑިއާގެ ޓެމިލްނާޑޫގެ އަށްސޭރިފަށާ ދިމާލަށް ޖެހޭނެކަމަށް ލަފާކުރެވޭ ކަމަށެވެ. އަދި މި ހަފުތާ ތެރޭގައި ރާއްޖެއާ ދުރުން ދެކުނުގައި ވެސް ކޮޅިގަނޑެއް އުފެދި ހުޅަނގަށް ޖެހޭނެކަމަށް ބެލެވޭ ކަމަށް ވެސް މެޓް އޮފީހުން ބުނެފިއެވެ.

މެޓުން އިތުރަށް ބުނީ، މި ދެ ކޮޅިގަނޑާ ގުޅިގެން މާދަމާ އިން ފެށިގެން ކުރިޔަށް އޮތް 5 ދުވަހު ރާއްޖޭގެ ސަރަހައްދުގެ އާންމު ވައި ބާރުވާނެ ކަމަށް ބެލެވޭ ކަމަށާއި، އެކަމުގެ ސަބަބުން އާންމު ގޮތެއްގައި ދެކުނާއި މެދު ރާއްޖޭގެ އަތޮޅުތަކަށް ގަޑިއަކު 17 މޭލާއި 27 މޭލާ ދެމެދުގެ ބާރުމިނުގައި އަދި އުތުރުގެ އަތޮޅުތަކަށް ގަޑިއަކު 13 މޭލާއި ދެމެދުގެ ބާރުމިނުގައި ވައިޖެހޭނެ ކަމަށް ބެލެވޭ ކަމަށެވެ.

އެހެންކަމުން އުތުރުގެ އަތޮޅުތަކުގައި ކަނޑުތައް ގަދަ ވަޔާއިއެކު ވިއްސާރަކޮށް ގުގުރުމާއިއެކު ވިލާގަަނޑުގައި ގާތްގަނޑަކަށް ގަޑިއަކު 40 މޭލާއި 55 މޭލަށް ވައިގަދަވުން ވެސް އެކަށީގެންވާ ކަމުގައި ވެސް މެޓް އިން ބުންޏެވެ. އަދި ދެކުނާއި މެދު ރާއްޖެ ތެރޭގެ ސަރަހައްދަށް އުދައިގެ އަސަރުކުރުން ވެސް އެކަށީގެންވާ ކަމުގައި މެޓް އިން ބުންޏެވެ.

އެހެންކަމުން ސްކޫލު ބަންދު ދުވަސްވަރާާ ގުޅިގެން ކަނޑުމަގުން ދަތުރު ކުރާ މީހުން އިތުރަށް ސަމާލުވުމަށް ފިޔަވަޅު އަޅަން މެޓް އޮފީހާއި ކަމާ ގުޅޭ އިދާރާތަކުން ވަނީ އިލްތިމާސްކޮށްފައެވެ.