ބާސެލޯނާގެ ޒުވާން ކުޅުންތެރިޔާ ލަމީން ޔަމާލް ގެ ފައިގެ ކުޑަހުޅަށް އަނިޔާވެ ތިން ހަފްތާއަށް ކުޅުމާއި ދުރަށް ދާންޖެހިއްޖެއެވެ. މިދިޔަ ހަފްތާބަންދުގައި ބާސެލޯނާ އާއި ލެގަނޭސް ބައްދަލުކުރި މެޗުގައި ލިބުނު އަނިޔާއާއި ގުޅިގެން ހެދި ޓެސްޓްތަކުން ދައްކާގޮތުގައި ޔަމާލްގެ ކުޑަހުޅުގެ ލިގަމެންޓް އަށް ވަނީ އަނިޔާވެފައެވެ.

މި އަނިޔާއާއި ގުޅިގެން މިއަހަރު ދެން ޔަމާލް ދަނޑުން ނުފެންނާނެއެވެ. ޔަމާލް އަށް އަނިޔާގެ ސަބަބުން ގެއްލޭ މެޗުތަކުގެ ތެރޭގައި ލީގުގައި ބާސެލޯނާ އާއި އެތްލެޓިކޯ މެޑްރިޑް ބައްދަކުކުރާ މެޗާއި ކޮޕަޑެލްރޭގައި ބަރބަސްޓްރޯ އާއި ބައްދަލުކުރާ މެޗާއި ލީގުގައި އެތްލެޓިކް ކުލަބާއި ވާދަކުރާމެޗު ހިމެނެއެވެ. އެންމެ އަވަހަށްވެސް ޔަމާލް އަށް ކުޅެވޭނެ ކަމަށް ބެލެވެނީ ޖަވަނަރީ 19 ގައި ގެޓަފޭ އާއި ދެކޮޅަށެވެ.

ޔަމާލްގެ ފަރާތުން މި ސީޒަނުގައި ދަނީ ތަފާތު މޮޅުކުޅުމެއް ދައްކަމުންނެވެ. އެގޮތުނު މިސީޒަނުގައި ބާސެލޯނާއަށް 21 މެޗުކުޅެދީ 6 ގޯލާއެކު 12 އެސިސްޓު ހަދާދީފައިވެއެވެ. އަދި ނިމިދިޔަ ޔޫރޯގެ އެންމެ މޮޅު ޒުވާން ކުޅުންތެރިޔާގެ މަޤާމާއި، އަހަރުގެ ގޯލްޑަން ބޯއީ ގެ އެވޯޑް އަދި ފްރާންސް ފުޓްބޯޅައިން ހޮވާ މިދިޔަ އަހަރުގެ ކޮޕާ އެޥޯޑް ޔަމާލް ހޯދާފައިވެއެވެ.