ކުރީގެ ރައީސް އަބްދުﷲ ޔާމިން އަބްދުލްޤައްޔޫމަކީ އެހެން މީހުންގެ ބޮލަށް ކަންކަން ޖަހައި، ޒިންމާއިން ރެކި އެހެން ބޭފުޅުނާއި ޒިންމާތައް ޙަވާލުކޮށް، ގިނަ ވަގުތު ތާސްކުޅުއްވުމާއި ސިންގަޕޫރުގައި ޝޮޕިން ކުރައްވަން ވަގުތު ހޭދަކުރެއްވި ބޭފުޅެއްކަމަށް ވިދާޅުވެ އެމަނިކުފާނުގެ ނައިބު ރައީސަކަށް ހުންނެވި އަޙުމަދު އަދީބް އަބްދުލްޤަފޫރު ރައީސް ޔާމިނަށް ވަރަށް ބޮޑަށް ފާޑުވިދާޅުވެއްޖެއެވެ.

އަދީބު މި މޭރުމުން ވާހަކަފުޅު ދައްކަވާފައިވަނީ ސިނަމާލެ ބުރިޖުގެ ލޭނުގެ އަދަދާއި ބެހޭގޮތުން އެކި ފަރާތްތަކުން އެކި ގޮތަށް ވާހަކަ ދައްކަމުންދާ ދަނޑިވަޅެއްގައި ބުރިޖާ ގުޅޭގޮތުން އާންމުކުރެއްވި ވީޑިއޯއެއް މެދުވެރިކޮށެވެ.

އަދީބް ވިދާޅުވީ ތަރައްޤީގެ ގިނަ މަސްރޫޢުތައް ކުރިޔަށް ދިޔައިރު ރައީސް ޔާމީންގެ ބައިވެރިވުން ކުޑަކަމަށާއި އެކަމާއިމެދު ހެކިވާނެ ކިތަންމެ ބަޔަކު މިހާރުވެސް ތިބޭނެކަމަށެވެ. އެގޮތުން ރައީސްއޮފީހުގެ މިނިސްޓަރު މުޙައްމަދު ހުސެން ޝަރީފާއި، މިހާރުގެ އިކޮނޮމިކް މިނިސްޓަރު މުޙައްމަދު ސަޢީދާއި ، އޭރުގެ ފިޝަރީޒް މިނިސްޓަރު ޝައީނީގެ އިތުރުން އޭރުގެ ހައުސިން މިނިސްޓަރ އަދި މިހާރުގެ ރައީސުލް ޖުމްހޫރިއްޔާ ޑރ މުޙައްމަދު މުޢިއްޒުގެ ނަންފުޅު އަދީބު ފާހަގަކުރެއްވިއެވެ.

ބުރިޖާ ގުޅޭ މަސައްކަތް ހިނގާދިޔަގޮތުގެ މައްޗަށް އެތަކެއް ހެއްކެއް ދައްކަވާ އަދީބު ވިދާޅުވީ ޗައީނާގެ ރައީސަށް އެކަން ޖަސްޓިފައިކޮށްދެއްވާ އެއްމޯޔޫގައި ސޮއިކުރެއްވީވެސް އެބޭފުޅާކަމަށެވެ. އަދި ބުރިޖްގެ ކުރެހުން ފައިނަލްކުރެވި ބުރިޖު ލޯންޗް ކުރުމަށް ރައީސް ޔާމީނަށް ދެންނެވި ކަމަށެވެ. ނަމަވެސް އެކަންވެސް ކުރައްވަން ޖެހިވަޑައިގަތީ އެބޭފުޅާއަށްކަމަށާއި ބުރިޖްގެ އެއްބަސްވުމުގައި ސޮއިކުރެއްވީވެސް އެބޭފުޅާކަމަށެވެ. އަދި ބްރިޖްގެ އަމަލީމަސައްކަތް ފެށިގެންދިޔަ ހިސާބުން އެކަން ކުރިޔަށް ދިޔައީ މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުޢިޒުގެ ބެއްލެވުމުގެ ދަށުން ކަމަށާއި ، ބުރިޖް މިހާރު ފެންނަން އެއޮތީ އިކޮނޮމިކް ކައުންސިލުން ފައިނަލް ވެގެންދިޔަ ގޮތަށްކަމަށެވެ.

ބްރިޖުން ލޭނެއް ގެއްލުނު ކަމަށް ބުނެ ކުރީގެ ރައީސް ޔާމީން ދާދި ފަހުން ދެއްކެވި ވާހަކަފުޅަށްވެސް އަދީބުވަނީ ރައްދުދެއްވާފައެވެ. މިގޮތުން ބައިސްކަލް ދުއްވުމަށާއި ޖޮގް ކުރުމަށް ހާއްސަކުރި ލޭންގައި ބައިސްކަލް ދުއްވަންނުޖެހޭނެކަމަށް ނިންމެވީ ސީދާ ރައީސްޔާމިނުކަމަށް އަދީބު ވިދާޅުވިއެވެ. އަދި ރައީސް ޔާމީނަކީ އެއްވެސްކަމެއް ހަނދާނުގައި ހުންނަވާ ބޭފުޅެއް ނޫންކަމަށާއި އެމް.އެމް.ޕީ.އާރު.ސީ މައްސަލައިގެ މޭސްތިރިޔަކީވެސް ރައީސް ޔާމީންކަމަށް އަދީބުވިދާޅުވިއެވިއެވެ. އެކަންވެސް އަދީބާއި ޒިޔަތުގެ ބޮލުގައި އެޅުއްވިގޮތަށް ބްރިޖްގެ ލޭނުވެސް ޑރ މުއިޒުގެ ބޮލުގައި އެޅުއްވުމަށް ޔާމިން މަސައްކަތް ކުރައްވާކަމަށް އަދީބު ވިދާޅުވިއެވެ.

ބުރިޖަކީ ހަޤީޤަތުގައިވެސް އެޅޭނެ އެއްޗެއްކަމަށް ޚުދު ރައީސް ޔާމީން ގަބޫލުފުޅުނުކުރައްވާކަމަށް އަދީބު ވިދާޅުވިއެވެ. އަދި ރައީސް ޔާމިނަކީ މިހާރުގެ ރައީސް ޑރ މުޙައްމަދު މުޢިއްޒާމެދު ޒާތީގޮތެއް ގެންގުޅުއްވި ބޭފުޅެއްކަމަށާއި، އެކަން ފެށިގެން އައީ ޑރ ވަޙީދުގެ ވެރިކަމުގައި ޔާމިންގެ ރަޙުމަތްތެރި ގޭންގެއްގެ ޕާކެއްގެ ތެރޭގައި ސްކޫލް ކުއްޖެއް މަރާލި މައްސަލައިގަ އެ ޕާކް ބަންދު ކުރި ހިސާބުންކަމަށެވެ. އަދި މި މައްސަލައިގައި ޔާމީން މިހާރުގެ ރައީސް ޑރ މުޢިއްޒަށް ވަރަށް ހަޑިހުތުރުބަހުން މުޙާތަބުކުރެއްވިކަމަށް އަދީބު ވިދާޅުވިއެވެ. އަދި ޔާމީންގެ ވެރިކަމުގައި އެމް.ޑީ.އޭ އިން ޑރ މުއިޒްގެ ނަންފުޅު ހުށަނޭޅުއްވިނަމަ މިނިސްޓަރުކަންވެސް ނުދެއްވީސްކަމަށް އަދީބު ވިދާޅުވިއެވެ.