ކުރީގެ ރައީސް އަބުދުﷲ ޔާމީން އަބުދުލްޤައްޔޫމްގެ ވިސްނުންފުޅާއި، ބަސްމަގު މިހާރު ވެއްޓިފައިވާ ހާލަތުން ވެގެން އުޅޭގޮތް ރައްޔިތުންނަށް ސާފުވާނެކަމަށް ހެލްތް މިނިސްޓަރު ޑރ. ޢަބުދުﷲ ޚަލީލް ވިދާޅުވެއްޖެއެވެ.

ކުރީގެ ރައީސް ޔާމީން ގެންދަވަނީ ޕީއެންއެފް ކިޔާ ޕާޓީއެއް އުފައްދަވައިގެން ފްރަންޓް އޮފީސް ޖަލްސާ ނަމުގައި ބައްދަލުވުންތަކެއް ބާއްވައި، މި ސަރުކާރަށާއި، ރައީސް ޑރ. މުޢިއްޒަށް ވަރަށް މަލާމާތް ރައްދުވާގޮތަށް، ބައެއް ފަހަރު ''ބާޒާރު ބަހުރުވައިން'' ވާހަކަފުޅު ދައްކަވަމުންނެވެ.

އަމިއްލަ ގެކޮޅުގައި އެންމެ ފަހުން ބޭއްވި ޕީއެންއެފްގެ ފްރަންޓް އޮފީސް ބައްދަލުވުމުގައި ރައީސް ޔާމީން ވަނީ ރައީސް މުޢިއްޒުގެ އީމާންތެރިކަމާއި ގުޅުވައި މަލާމާތް ކުރަށްވާފައެވެ.

އެކަމަށް ރަށްދުދެއްވައި ޑރ. ޚަލީލް ވިދާޅުވީ، ރައީސްކަން ކުރެއްވި ބޭފުޅެއްގެ ބަސްމަގާއި ވިސްނުންފުޅު މިޙާލަތަށް ވެއްޓުމުން، ވެގެން އުޅުއްވަނީ ކީއްވެގެންކަން ރައްޔިތުންނަށް ވަރަށް ބޮޑަށް ސާފުވާނެ ކަމަށެވެ.

''ރާއްޖޭގެ ރައީސްކަން ކުރެއްވި ބޭފުޅެއްގެ ބަސްމަގާއި ވިސްނުންފުޅު މިޙާލަތަށް ވެއްޓުނީމާ، މި އުޅުއްވަނީ ކީއްވެގެންކަން ރައްޔިތުންނަށް ވަރަށް ބޮޑަށް ސާފުވާނެ. ގޮތް ނިންމާނީ ރައްޔިތުން.'' ޑރ. ޚަލީލް ވިދާޅުވެފައެވެ.

ރައީސް ޑރ. މުހައްމަދު މުޢިއްޒަކީ ވަރަށް ދީނީ ކަންކަމަށް ލޯބިކުރަށްވާ ފަސްވަގުތު ނަމާދުކުރަށްވާ ރައީސެކެވެ. ރާއްޖޭގެ ފަހުގެ ތާރީޚްގައި އެންމެ ދީނީ ކަންކަމަށް ފަރުވާތެރިކަން ބަހައްޓަވާ ވެރިއެއްގެ ގޮތުގައި އެމަނިކުފާނު ފާހަގަވެއެވެ.

ވެރިކަމަށް ވަޑައިގަތުމުގެ ކުރީން ވެސް އެމަނިކުފާނަކީ ޖަމާއަތަށް ނަމާދަށް ވަޑައިގަންނަވާ ބޭފުޅެއްކަން ގިނަ ބަޔަކު ދަނެއެވެ.